SSS at DOH Caraga, nagkasundo para sa social security protection ng mga JO at COS worker

ni Fely Ng @Bulgarific | June 18, 2025

Hello Bulgarians! Nilagdaan ng Social Security System (SSS) ang isang Memorandum of Agreement (MOA) kasama ang Department of Health (DOH) Caraga Region upang matiyak ang social security protection ng 200 Job Order (JO) at Contract of Service (COS) na manggagawa ng huli. 

Sa ilalim ng SSS KaSSSangga Collect Program, ang mga JO at COS na manggagawa ng DOH Caraga ay nakarehistro bilang mga self-employed na miyembro ng SSS. 

Samantala, ang DOH Caraga Region ang mamamahala sa pagkolekta at pag-remit ng kanilang Social Security (SS) at Employees’ Compensation (EC) kontribusyon sa SSS Butuan Branch sa pamamagitan ng automatic salary deduction scheme upang masiguro ang kanilang benepisyo at loan eligibility.

Sinabi ni SSS Acting Vice President for Mindanao North Division Benigno J. Dagani Jr., partikular na target ng KCP ang Job JO at COS na mga manggagawa mula sa local government units (LGUs), National Government Agencies (NGAs), State Colleges and Universities at iba pang organisadong grupo mula sa professional sector. 

Ipinaliwanag din ng opisyal na ang programa ay nagsisilbi rin sa mga regular na empleyado na dating nagtatrabaho sa pribadong sektor. 

Maaari nilang piliing i-activate muli ang kanilang membership sa SSS sa pamamagitan ng pagpapalit ng kanilang membership type mula sa employed to voluntary at magpatuloy sa pagbabayad ng kontribusyon sa pamamagitan ng salary deduction. 

Simula Marso 2025, ang SSS Butuan Branch ay may 36 participating partner sa ilalim ng KCP at pipirma ng kasunduan sa tatlong iba pang NGAs sa pagtatapos ng unang semestre ng 2025.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.

SSS at Life Builder Fellowship, pormal na lumagda sa kasunduan

ni Fely Ng @Bulgarific | June 2, 2025

Hello Bulgarians! Pormal na minarkahan ng Social Security System (SSS) at Life Builder Fellowship ang isang Memorandum of Agreement (MOA) sa ilalim ng Contribution Subsidy Provider Program (CSPP) na ginanap sa Calumpit, Bulacan.

Sinabi ni SSS Vice President for Luzon Central 2 Division Gloria Corazon Andrada na nangako ang Life Builder Fellowship na i-sponsor ang buwanang kontribusyon sa SSS ng isang grupo ng sampung dedicated volunteer sa loob ng hindi bababa sa anim na buwan, na may planong palawigin ang suporta sa mas maraming boluntaryo sa hinaharap.

“Many volunteers generously give their time and effort without any compensation,” saad ni Andrada. 

“Through partnerships like this, we ensure that no one is left behind when it comes to social protection,” dagdag pa niya.

Sa sandaling matugunan ng mga benepisyaryo ng CSPP ang mga qualifying condition, magkakaroon na sila ng access sa mga benepisyo ng SSS tulad ng sickness, maternity, disability, retirement, death at funeral. Kasama rin ang loan privileges tulad ng salary at calamity loan.

“Life Builder Fellowship’s effort reflects the church’s holistic mission — providing not only spiritual guidance but also the long-term financial stability of its members through active social security membership. Their strong dedication in advancing social welfare is truly commendable,” sabi ni Andrada.

Ang Life Builder Fellowship’s Head Pastor Jesus Bagasin, Jr. ay nagpahayag din ng kanyang suporta para sa inisyatiba. 

“We believe that serving God should not come at the cost of one’s future. By taking responsibility for our volunteers’ SSS contributions, we are not only fostering their spiritual growth but also securing their financial future. This is our way of honoring those who have tirelessly served the church and the broader community,” pahayag ni Bagasin.

Ang CSPP ay isang pangunahing inisyatiba ng SSS na idinisenyo upang palawigin ang panlipunang proteksyon sa mga informal worker, mga mababa ang kita, at iba pang mga vulnerable sector. Gumagana ang programa sa pamamagitan ng pakikipag-ugnayan sa mga indibidwal, organisasyon, o institusyong handang mag-subsidize ng mga kontribusyon sa ngalan ng mga miyembrong ito.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.

Pag-IBIG Fund assets, umabot ng P1.1T sa Q1 2025

ni Fely Ng @Bulgarific | May 29, 2025

Hello, Bularians! Ang kabuuang assets ng Pag-IBIG Fund ay umabot na sa P1.1 trilyon noong Marso 31, 2025, binibigyang-diin ang patuloy na lakas ng pananalapi nito at muling pinagtitibay ang posisyon bilang nangungunang institusyong pinansyal ng pamahalaan sa bansa. Mula sa P1.069 trilyon sa pagtatapos ng 2024, ang kabuuang asset ay lumago ng P34.37 bilyon sa unang quarter pa lamang ng taon — dahil ito sa patuloy na pagpapalawak ng loan portfolio nito, maingat na pamumuhunan, at matatag na ipon ng mga miyembro.

Ang Pag-IBIG Fund ay nag-post ng solid equity base na P776.52 billion noong unang quarter, na kumakatawan sa pinagsamang value ng members’ equity, retained earnings, at iba pang reserba. Ang malakas na pinansyal na katayuan na ito ay nagbibigay-daan sa ahensya na patuloy na palaguin ang halaga ng ipon ng mga miyembro habang patuloy na nagbibigay ng mga loan program na magagamit ng 16.55 milyong active member nito.

Bilang karagdagan sa equity position, pinanatili ng Fund ang P21.29 bilyong cash and cash equivalents at pinalawak ang investment portfolio sa P133.06 bilyon — na nagpapakita ng strategic focus on liquidity at income-generating placement. Kabilang sa iba pang pangunahing bahagi ng asset ang ari-arian at kagamitan, investment properties, at various non-current assets.

Sa unang bahagi ng buwang ito, muling iginiit ni Pag-IBIG Fund Chief Executive Officer Marilene C. Acosta ang 10-year vision ng ahensya: na magdeklara ng hindi bababa sa 10% sa annual dividend, palawakin ang digital access, at isulong ang advance financial inclusion para sa mga sektor na kulang sa serbisyo. Kasama rin sa long-term strategy ang pagpapalakas sa Fund’s sustainability at pagpapahusay sa tungkulin nito sa pagbuo ng bansa sa pamamagitan ng inclusive home financing — ganap na nakaayon sa direktiba ni Pangulong Ferdinand R. Marcos, Jr. na mapabuti ang kalidad ng buhay ng bawat Pilipino sa pamamagitan ng abot-kaya at marangal na tirahan.

Sa unang quarter ng 2025, ang Pag-IBIG Fund ay naglabas ng P30.22 bilyon sa housing loan, habang ang kabuuang koleksyon ng membership savings ay umabot sa P40.41 bilyon — isang kahanga-hangang 41% na pagtaas mula sa P28.76 bilyon na nakolekta sa parehong panahon noong nakaraang taon. Iniulat din ng Fund ang isang malakas na performing loans ratio na 94.13%, na sumasalamin sa mahusay na portfolio management at patuloy na disiplina sa borrower.

---

Para sa anumang impormasyon, opinyon, isyu o maging imbitasyon, mag-e-mail sa bulgarific@gmail.com o sumulat kay Ms. Bulgarific at ipadala sa Bulgar Bldg., 538 Quezon Avenue, Quezon City.