Position paper at reply sa kasong illegal dismissal

ni Atty. Persida Rueda-Acosta - @Magtanong Kay Attorney | June 22, 2022

Dear Chief Acosta,

Ako ay call center agent para sa business process outsourcing (BPO). Tinanggal ako sa trabaho kaya ako ay nagsampa ng kasong Illegal Dismissal sa National Labor Relations Commission (NLRC). May mga naka-set na hearing, ngunit ang tanging pinagawa lang sa amin ay magsumite ng Position Paper at Reply. Hindi kami binigyan ng pagkakataong harapin ang aming kalaban upang matanong ng diretsahan. Hindi rin ako binigyan ng pagkakataong mag-testify sa aking kaso. Nagulat na lamang ako na naglabas ng desisyon ang Labor Arbiter. Tama ba ito? - Jay

Dear Jay,

Ang sagot sa inyong katanungan ay sinagot ng Korte Suprema sa kaso ng Josefina Cada vs. Time Saver Laundry/Leslie Perez (G.R. No. 181480, January 30, 2009, Ponente: Honorable Former Associate Justice Minita Chico-Nazario), kung saan sinabi na ang aktuwal na trial-type hearing ay hindi kinakailangan:

“The essence of due process is simply an opportunity to be heard or as applied to administrative proceedings, an opportunity to explain one’s side or an opportunity to seek a reconsideration of the action or ruling complained of. What the law prohibits is absolute absence of the opportunity to be heard; hence, a party cannot feign denial of due process where he had been afforded the opportunity to present his side. A formal or trial type hearing is not at all times and in all instances essential to due process, the requirements of which are satisfied where the parties are afforded fair and reasonable opportunity to explain their side of the controversy.” (Binigyang-diin)

Sang-ayon sa nasabing desisyon, ang karapatan sa due process ay natutugunan basta ang magkabilang partido ay binigyan ng pagkakataong ipresinta ang kanilang panig. Dahil dito, ang pagsusumite ng inyong Position Paper at Reply ay sapat na pagkakataon upang maipahayag ang inyong panig at ang trial-type hearing ay hindi na kinakailangan.

Sana ay nabigyan namin ng linaw ang inyong katanungan. Ang payong aming ibinigay ay base lamang sa impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.