Polluted na sa basurang impormasyon ang socmed

ni Ka Ambo - @Bistado | October 30, 2021

BABAGUHIN na ng Facebook ang kanilang pangalan.

Aminado silang hindi nila malilinis ang daloy ng impormasyon na karaniwan ay “basura” o fake information!

◘◘◘

MALINAW na dispalinghado ang Facebook.

Wala itong sapat na karanasan tulad sa mainstream media!

◘◘◘

HINDI kailanman mapapalitan ang mainstream media.

Ang problema lang sa mainstream media ay korupsiyon at dispalinghadong editor!

◘◘◘

TRADISYUNAL na sinasala at ini-edit ang impormasyon na inilalabas sa mainstream media.

Pero, walang ganyang iskema at sistema sa social media!

◘◘◘

ANG social media ay polluted sa basurang impormasyon.

Tulad sa nagaganap na kampanyahan, hindi kapani-paniwala ang impormasyong naka-post!

◘◘◘

ANG mga pulitiko ay garapalang pinupuri ang kanilang sarili.

Uupakan naman sila ng kanilang mga kalaban sa pulitika gamit ang malalaswang impormasyon.

Hindi ba’t kababuyan ‘yan sa paglalabas ng impormasyon?

◘◘◘

WALA nang kredibilidad ang Facebook.

Hindi na ito kapani-paniwala!

◘◘◘

NAG-PEAK na ito at wala nang kauuwian kundi ang gumuho at mag-collapse.

Hindi malayong magising tayo isang umaga na wala nang Facebook — matutunaw ang impormasyong nai-post dito ng mga nauutong account holders!

◘◘◘

PATUNGO na ang lahat sa metaverse.

Kung kakaunti ang nakauunawa sa modernong IT, kakarampot din ang nakaiintindi sa metaverse!

◘◘◘

MAGING ang Facebook executives ay mangmang kung ano talaga ang kahulugan nito.

Nag-imbento sila ng bagong termino, kahit sila ay hindi nakauunawa!

◘◘◘

NAIWANAN na ng teknolohiya ang humanidad o sangkatauhan.

Hindi na maunawaan ang inimbento nilang “demonyo” na dinidiyos ng modernong kabataan!

◘◘◘

LAHAT halos ng kabataan ay hindi natutulog sa gabi dahil sa modernong daloy ng impormasyon.

Nasira na ang depinisyon kung ano ang “tao”!

◘◘◘

IBA na ang “kultura” ng kabataan, apektado sila ng teknolohiyang kanilang kinababaliwan.

Isang ritwal na lang ang pagpunta sa sekta o relihiyon.

Hindi na nila nauunawaan ng pangangailangan ng “diyos”!

◘◘◘

MAGING ang moralidad ay nabago na.

Malayo na ito sa ibininhi o isinabuhay ng kanila mga ninuno!

◘◘◘

NALIGAW na ang ating henerasyon.

Walang nagtatangka na itumpak ito sa dapat kalalagyan!