Pinas na lang ang tumatangkilik sa Facebook

ni Ka Ambo - @Bistado | November 3, 2021

NAKAKASUYA na ang mga post sa social media.

Lahat halos ay simpleng propaganda!

◘◘◘

NABABOY na ang social media.

May iba na itong konotasyon: Basurang impormasyon!

◘◘◘

SA Pilipinas na lang tinatangkilik ang Facebook.

Sa ibang bansa, pinandirihan ito dahil sa pagiging salaula sa paglalabas ng impormasyon!

◘◘◘

ANUMANG inilalabas rito ay walang kredibilidad.

Naging tapunan ito ng mga palsipikadong impormasyon!

◘◘◘

PERO, marami pa ring pulitiko ang gumagamit nito at nag-aaksaya ng kanilang badyet.

Alam naman ng publiko, na walang kredibilidad ang lumalabas na impormasyon sa social media!

◘◘◘

ANG bawat kampo ng mga pulitiko at account owners ay nagpapalitan ng patutsada kung saan — ang bawat isa ay bumabatikos sa kani-kanilang post.

Ayon sa isang panig, peke ang impormasyon at ayon naman sa kabila ay peke rin ang karibal sa post.

Pwes, pare-pareho silang palsipikado.

Kumbaga, sinalaula ng Facebook ang sarili nilang pag-aari!

◘◘◘

WALA itong kakayahang maghugas ng sariling baho.

Ano ang kahihinatnan nito sa hinaharap?

Kanser ‘yan sa paglalabas ng impormasyon!

◘◘◘

AMINADO ito na sinalaula na ang mga post.

At aminado rin sila na hindi nila kayang ilampaso o linisin ang sariling bakuran!

◘◘◘

GUMAGAWA ngayon ng paraan ang Facebook upang makatakas sa pagiging iresponsable.

Babaguhin na ang pangalan nito.

Ito na ang kanilang “waterloo”.

Ikababagsak ‘yan ng Facebook, dahil aktuwal na pag-amin ito ng isang imbensiyon na naging monster at milyon ang naging biktima!

◘◘◘

NAKAPAGTATAKANG napakarami pa rin ang nagpapaloko sa Facebook.

Ang kanilang mga post — ay inaari ay pinagkikitaan ng Facebook nang hindi sila binabayaran.

Hindi alam ng publiko na inuutu-uto lang sila ng Facebook — pero “willing victims” ang mga Pinoy.

Isang klase ‘yan ng kamangmangan sa modernong henerasyon!