'Pinas host ng SEAG sa 2033

ni MC - @Sports | July 15, 2022

Muling idaraos sa Pilipinas ang Southeast Asian Games sa 2033 kung saan ito ang magiging ika-5 hosting ng bansa ng biennial regional games mula nang maging matagumpay ang hosting noong 2019 kung saan itinanghal na overall champion ang mga Pinoy.

“We offered a bid to host anew in 2033 and the council unanimously approved,” ayon kay Philippine Olympic Committee President Rep. Abraham “Bambol” Tolentino kahapon kaugnay ng katatapos na SEA Games Federation Council Meeting noong Miyerkules sa Phnom Penh, ang host ng 2023 32nd edition ng games.

Nag-host ang Vietnam matapos ang one year-postponement ng 31st edition noong Mayo. Matapos ang Cambodia, magbabalik ang games sa Bangkok sa 2025, sa Kuala Lumpur sa 2027, sa Singapore sa 2029 at sa Laos sa 2031.

Unang nag-host ang Pilipinas ng SEA Games noong 1981, pagkatapos ay noong 1991 at 2005, kung saan din nag-overall champion ang 'Pinas. Tanging ang Timor Leste lang ang hindi nagho-host ng games.

Ang 2033 hosting ay poral na iprinisinta sa Malacanang para sa pagtanggap ng Philippine government sa responsibilidad. “After presenting the hosting bid to the council, and following its approval, the POC and the SEA Games Council will ask the Philippine government to issue a letter of support,” ani Tolentino, na sinamahan sa Phnom Penh nina deputy secretaries general Bones Floro at Carl Sambrano. “If the government declines, the hosting chores will be offered to another country.”

Ang 'Pinas ay itinanghal na third overall noong 1981 na nakasungkit ng 55-55-77 gold-silver-bronze tally, ikalawa sa Indonesia sa one gold noong 1991 sa 91-62-84 na bilang ng mga medalya, una noong 2005 na may 112-84-94 at muli No. 1 noong 2019 sa 149-117-121.