ni Atty. Persida Rueda-Acosta @Magtanong Kay Attorney | April 23, 2024
Dear Chief Acosta,
Ako ay limang taon nang kasal. Bilang bahagi ng aming pagdiriwang sa aming ikalimang taon, nais ko sanang magbigay ng regalo o donasyon sa aking asawa. Kaugnay nito, nais kong maliwanagan kung may mga legal na balakid ba kung sakaling ito ay aking gagawin. Maraming salamat. -- Mima
Dear Mima,
Ang bisa ng isang donasyon o regalo sa pagitan ng mag-asawa ay nakadepende sa panahon o okasyon kung kailan nangyari ang nasabing donasyon, at sa halaga nito. Ito ay alinsunod sa Artikulo 87 ng Executive Order No. 209, o mas kilala sa tawag na Family Code of the Philippines. Ayon sa nasabing probisyon:
“Art. 87. Every donation or grant of gratuitous advantage, direct or indirect, between the spouses during the marriage shall be void, except moderate gifts which the spouses may give each other on the occasion of any family rejoicing. The prohibition shall also apply to persons living together as husband and wife without a valid marriage.”
Kaugnay sa nabanggit, muling sinabi ng Korte Suprema sa kasong Perez vs. Senerpida (G.R. No. 233365, March 24, 2021), sa panulat ni Honorable Associate Justice Alfredo Benjamin Caguioa, ang dahilan sa nasabing probisyon ng batas:
“Going back to Article 87 of the Family Code, the reason for the prohibition is explained thus:
x x x This provision refers to donation inter vivos. It is dictated by the principle of unity of personality of the spouses during the marriage, and is intended to avoid possible transfer of property from one spouse to the other due to passion or avarice. The intimate relations of the spouses during the marriage places the weaker spouse under the will of the stronger, whatever the sex, so that the former might be obliged, either by abuse of affection or by threats of violence, to transfer some properties to the latter. The law seeks to prevent such exploitation in marriages which might have been contracted under this stimulus of greed.”
Samakatuwid, malinaw sa nabanggit na batas at desisyon na kalimitan na hindi pinahihintulutan at walang bisa ang donasyon sa pagitan ng mag-asawa. Ito ay sa kadahilanan na iniiwasan ng batas na magkaroon ng pagsasamantala sa mga pagsasama na maaaring bunga ng kasakiman. Ganunpaman, bilang eksepsyon, pinahihintulutan ang donasyon o regalo na moderate o katamtaman lamang ang halaga sa mga panahon ng pagsasaya ng pamilya.
Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.
Maraming salamat sa iyong patuloy na pagtitiwala.