Pilya, hindi nagpatinag sa astigin ng Turf

ni Green Lantern @Renda at Latigo | January 17, 2022

Hindi nasindak si Pilya sa mga tigasing kalaban kaya nasilo ang panalo sa PHILRACOM Rating Based Handicapping System na inilarga sa Metro Turf, Malvar - Tanauan City sa Batangas noong Linggo ng hapon.

Humarurot agad sa largahan si Pilya upang hawakan ang tatlong kabayong agwat sa humahabol na si Nicole's Best at Yakapin Mo Ako.

Nasa kalagitnaan pa lang ng laban ay inagaw na ni Yakapin Mo Ako ang unahan kay Pilya.

Lamang pa rin si Yakapin Mo Ako pagsapit ng huling kurbada, umabot pa sa dalawang kabayo sa rektahan pero umigkas si Pilya at nagkapanabayan ang dalawa.

Sa huling 50 metro ng laban muling lumampas si Pilya at nanalo ito ng may kalahating kabayo ang agwat sa sumegundong Yakapin Mo Ako.

Ginabayan ni jockey RJC Tabor, inirehistro ni Pilya ang tiyempong 1:29.6 sa 1,400 meter race sapat upang hamigin ng winning horse owner na si WC Tan ang P10,000 karagdagang premyo.

Segundo si Yakapin Mo Ako, terserong tumawid sa finish line si Nicole's Best habang pumang-apat si Heavenly Star na nirendahan ni Rodeo Fernandez.

May 10 karera ang pinakawalan ng Metro Manila Turf Club Inc. (MMTCI) noong Linggo, lahat ay suportado ng Philippine Racing Commission, (PHILRACOM) sa pamumuno ni chairman Reli De Leon.