PHL, Yuko sa Timor Leste sa AFC

ni Anthony E. Servinio - @Sports | November 2, 2021

Tinapos ng Pilipinas ang kampanya sa Asian Football Confederation (AFC) Under-23 Asian Cup Qualifiers sa isang masakit na 1-0 pagyuko sa Timor Leste noong Linggo sa Jalan Besar Stadium ng Singapore. Ipinasok ni Zenivio Mota ang nag-iisang goal sa ika-89 minuto para sa ikatlong sunod na pagkabigo ng mga Pinoy kung saan wala rin silang naipasok na goal.

Kahit saglit natigil ang laban dahil sa malakas na kulog at kidlat sa palaruan, tuloy pa rin ang kayod ng Pilipinas at mukhang matatapos sa tabla ang laro subalit dumating ang disgrasya na may isang minuto pa sa orasan. Bago nito, natalo ang Pilipinas sa defending champion Timog Korea (3-0) at punong abala Singapore (1-0).

Susunod para sa koponan ang Southeast Asian Games sa Vietnam sa Mayo, 2022. Ang parating na SEAG Men’s Football ay bukas para lang sa mga manlalarong ipinanganak simula Enero 1, 1999 subalit maaari silang kumuha ng hanggang dalawang higit ang edad upang palakasin ang koponan

Samantala, inihayag ng United City na hindi sila lalahok sa 2021 Copa Paulino Alcantara na magsisimula sa Nob. 7 sa Philippine Football Federation (PFF) National Training Center sa Carmona, Cavite. Sa halip, magtutuon ng pansin ng kampeon ng PFL sa depensa ng kanilang titulo sa 2022.