ni Gerard Arce - @Sports | September 11, 2021
Tiyak ng mabibigyan ng pagkakataon ang bansa na makakuha ng bagong pagkukunan ng medalya sa Setyembre 2022 Hangzhou Asian Games sa China matapos pinal ng gawing medal events ang Esports.
Inihayag ng Olympic Council of Asia (OCA) ang pormal na pagkakasama ng Esports sa quadrennial games bilang medal events na may pag-aagawang 8 medalya, dahil na rin umano sa malaking popularidad na dala nito sa China at sa kabuuan ng Asya.
Ilan sa mga larong paglalabanan sa 19th edition ay ang Arena of Valor Asian Games Version, Dota 2, Dream Three Kingdoms 2, EA SPORTS FIFA branded soccer games, Hearthstone, League of Legends, PUBG Mobile Asian Games Version at Street Fighter V. “We hope that this announcement allows all participating teams ample time to prepare and equip themselves ahead of the qualifying stages,” wika ni Olympic Council of Asia director general Husain Al-Musallam. “I believe we have ticked all the right boxes ensuring a high level of competition which promises great viewing for enthusiasts and casuals alike,” aniya.
Nakatakda ring ipamalas ng AESF ang dalawang demonstration sports na kinabibilangan ng AESF Robot Masters-Powered by Migu at AESF VR Sports-Powered by Migu, dahil na rin sa pagkakaroon ng mga video games ng lakas sa panibagong henerasyon sa mga nagdaang taon.
Noong 2019 ay sinimulang ipakilala sa Manila biennial meet ang Esports na pinagharian ng bansa sa pagkakaroon ng 3 gintong medalya at tig-isang silver at bronze. Nasaksihan ang mga larong Dota 2, Starcraft II, Mobile Legends: Bang Bang, na pinagharian ng Gilas Sibol national team, Arena of Valor, Hearthstone at Tekken 7.
Kabilang sa mga napisil ng Vietnam Recreation and eSports Association (VIRESA) na lalaruin sa 31st SEAG sa Hanoi, Vietnam ay ang Arena of Valor (AOV), FIFA online 4, League of Legends (PC), League of Legends: Wild Rift (Mobile) para sa men at women’s category, ang First Person Shooter (FPS) events na Crossfire (PC), Free Fire (Mobile), at Player Unknown’s Battlegrounds (PUBG) Mobile para sa Individual at Team event at ang paborito ng mga Pinoy na Mobile Legends: Bang Bang (Mobile).