Perfect Delight nakasilo ng korona

ni Green Lantern @Renda at Latigo | September 12, 2023

Pinagulong ni Perfect Delight ang mga nakatunggaling batang kabayo upang siluin ang korona sa 2023 PHILRACOM Imported Maiden Stakes Race na inilarga sa Metro Turf, Malvar sa Tanauan City, Batangas noong Linggo.

Parang sibat na umarangkada sa largahan si Perfect Delight para hawakan ang bandera at makalamang ng tatlong kabayong agwat kina Heavy Weight at Flywheel sa kalagitnaan ng karera.

Nasilayan ng mga karerista ang husay ni Perfect Delight ng umungos pa lalo sa anim na kabayo pagdating ng far turn. "Napakainam na kabayo, halos hindi nahirapan at parang nag-ensayo lang," saad ni Albert Guerrero, veteran karerista.

Pagsapit ng huling kurbada ay umabot sa pitong kabayo ang abante ni Perfect Delight kaya naman kampante na ang mga kareristang nakataya sa kanya.

Tinawid ng Perfect Delight ang meta ng may mahigit na 10 kabayo ang lamang sa pumangalawang Flywheel, tersero ang Heavy Weight at pang-apat ang Viva D' Oro.

Nirendahan ni Mark Alvarez, inirehistro ng Perfect Delight ang tiyempong 1:39 minuto sa 1,600 meter race sapat upang hamigin ang P720,000 premyo.

Nakopo ng Flywheel ang P270,000 habang tig-P150,000 at P60,000 ang third at fourth placers na Heavy Weight at Viva D' Oro ayon sa pagkakasunod.

Kinubra naman ng breeder ng winning horse ang P60,000 habang tig-P36,000 at P24,000 ang second at third sa event na suportado ng Philippine Racing Commission (PHILRACOM) ni Chairman Reli de Leon.