PBBM, bumoto sa Ilocos Norte

ni Eli San Miguel - Trainee @News | October 30, 2023

Bumoto na si Pangulong Ferdinand R. Marcos Jr. sa halalan ng barangay sa Mariano Marcos Memorial Elementary School sa Batac City, ngayong Lunes, ika-30 ng Oktubre.

Natapos bumoto si Marcos sa Precinct 36A-37A mga bandang 7:05 ng umaga. Kasama niya sina Ilocos Norte Rep. Sandro Marcos at Batac City Mayor Albert Chua.

Sa Calay-ab Elementary School sa Barangay Calay-ab naman bumoto sina Rep. Marcos at unang ginang Liza Araneta-Marcos.

Sina Sen. Imee R. Marcos at Ilocos Norte Gov. Matthew Marcos Manotoc ay bumoto naman sa Cabeza Elementary School sa Barangay Cabungaan.

Samantala, sinabi ni Police Col. Julius Suriben, hepe ng pulisya ng Ilocos Norte, na karaniwang tahimik ang halalan sa probinsyang ito.

Nananatili naman sa "full alert status" ang lahat ng law enforcement personnel na inilabas sa probinsya para tiyakin ang maayos na pagpapatakbo ng halalan.

Kamakailan, may 2,000 tauhan mula sa pulisya, militar, Bureau of Fire Protection, Coast Guard, at iba pang ahensiyang tagapagtanggol ng batas ang inilagay sa iba't-ibang mahahalagang lokasyon sa probinsya.