Patung-patong na ang sakit… DAGUL, NAGPASAKLOLO KAY JULIA

ni Beth Gelena @Bulgary | August 7, 2026

Photo: XFM & IG _montesjulia08

Nanawagan ang komedyanteng si Dagul sa kanyang mga dating nakatrabaho sa Goin’ Bulilit (GB), lalo na kay Julia Montes, na sana ay matulungan siyang makabalik sa trabaho.

Sa panayam kay Dagul sa Kay Susan Tayo! vlog sa YouTube (YT), aniya, “Sa Goin’ Bulilit, alam ko naman talaga na marami sa inyo ang sumikat. Sana ay mapansin n’yo ako kung may maitulong kayo. Tulad ng kay Julia, Julia Montes... kailangan ko ang tulong n’yo.”

Idinagdag pa niya na bukas siya sa anumang papel, kahit maliit lamang.

Aniya, “‘Yung mga sumisikat d’yan na kailangan ako sa show n’yo, kahit palamuti lang, tatanggapin ko ‘yan. Kahit ano’ng role para lang sa pamilya ko.”

Ibinahagi rin niya ang kanyang kasalukuyang kalagayan. Gumagaling na siya mula sa ilang beses na pagkakaospital dahil sa pneumonia at sleep apnea.

Gumagamit siya ngayon ng wheelchair dahil sa problema sa tuhod at hirap sa paglalakad. Mino-monitor din ang kanyang kidney.

May katarata siya sa kaliwang mata, ngunit hindi pa maisagawa ang operasyon dahil kailangan pa ng mga pagsusuri sa puso at may mga alalahanin sa gastusin at kailangan din ng anesthesia.

Sa kabuuan, panawagan sa kanyang mga dating kasamahan at iba pang personalidad sa industriya na kung may maiaalok na proyekto, handa niya itong tanggapin upang masuportahan ang kanyang pamilya.

Sana nga ay makarating kay Julia Montes at maging kay Coco Martin ang panawagang ito ni Dagul at kunin siya sa Sigabo. 

---

NAGHAIN si Rep. Javi Benitez ng House Resolution No. 1280 upang purihin ang SB19 para sa kanilang mga kamakailang tagumpay sa turismo at musika.

Kasama ng mambabatas sa paghahain ng panukala sina Reps. Nelson Legacion, Sarah Jane Elago at Kathryn Joyce Gorriceta.

Kinilala rin niya ang makasaysayang pagpapakita ng P-pop group sa Lollapalooza 2026 at sa isang laro ng Major League Baseball sa Chicago.

Ayon sa mambabatas, ang internasyonal na presensiya ng SB19 ay maaari ring lumikha ng mga oportunidad para sa musika at turismo ng Pilipinas.

Noong Hulyo 26, opisyal na itinalaga ng Kagawaran ng Turismo ang SB19 bilang pinakabagong ambassador ng turismo ng Pilipinas.

Sa kanilang bagong tungkulin, inaasahang tutulong sina Pablo, Josh, Stell, Ken, at Justin sa pagpapalaganap ng kultura at mga destinasyon ng bansa sa pamamagitan ng kanilang musika.

Binanggit din sa resolusyon ang naunang paghirang sa grupo bilang Youth and Sentro Rizal Ambassadors ng National Commission for Culture and the Arts noong 2021.

Ilang araw matapos ang kanilang pinakahuling appointment sa turismo, nakamit ng SB19 ang isa na namang internasyonal na milestone sa Chicago, kung saan si Josh Cullen ang naghagis ng seremonyal na unang pitch bago ang laro ng Chicago White Sox laban sa New York Yankees sa Rate Field.

Kinabukasan naman ay umawit ang SB19 sa Lollapalooza sa Grant Park, Chicago. Nagtanghal ang grupo ng 10 kanta sa Allianz Stage.

Ayon sa resolusyon, ang limang miyembrong grupo ang naging unang lokal na Pilipinong artist na nagtanghal sa naturang music festival.

“When our artists carry the country with them, they open doors no amount of promotion can buy,” ani Benitez.