Pasaway, pakalat-kalat, huhulihin — DILG

ni Mylene Alfonso @News | April 2, 2026

Photo: DILG / FB

Inanunsyo ng Department of the Interior and Local Government (DILG) ang mas mahigpit na pagpapatupad ng mga panuntunan para sa kaligtasan ng publiko sa ilalim ng kanilang Safer Metro Manila initiative.

Ipinaalala ni Sec. Jonvic Remulla sa mga residente na ipinagbabawal ng Anti-Public Intoxication Act ang pag-inom sa mga kalsada at iba pang pampublikong lugar.

"Bawal na ang mag-inom sa kalye. Bawal na ang maglatag ng mga silya at mga lamesa sa mga kalye at mag-inuman. Doon na nanggagaling number one ang away, number two ang sexual harassment," wika ni Remulla.

Nagbabala ang kalihim na huhulihin ang sinumang mga lalabag.

Muling iginiit ng ahensya ang pinaigting na mga patakaran sa curfew para sa mga menor-de-edad.

Ang mga kabataan na walang patunay ng nagtatrabaho o nag-aaral ay hindi pinapayagang manatili sa mga lansangan matapos ang alas-10 ng gabi.

"'Yung mga rugby boys d'yan, 'yung mga geng-geng d'yan, magtago na kayo. Umuwi na kayo 'pag 10 p.m. Huhulihin namin kayo," diin ni Remulla.

Pinaaalalahanan din ang mga kalalakihan na hindi papayagan ang paglalakad nang walang suot na pang-itaas sa pampublikong lugar, kahit pa mainit ang panahon.

Binalaan din ang mga residente na ipinagbabawal ang pagkanta ng videoke lampas alas-10 ng gabi, maliban na lamang kung may espesyal na okasyon na may permit mula sa barangay.

"'Pag alas-10 [ng gabi], nagbi-videoke pa kayo o kapitbahay n'yo, nagbi-videoke, tumawag na kayo sa 911. At pupuntahan po ng pulis 'yan at papatigilin," saad pa ni Remulla.