Pangarap lang daw dati… WILBERT, PROUD NA KAHIT PROMDI, SOLD-OUT ANG 2-DAY CONCERT

ni Beth Gelena @Bulgary | August 5, 2026

Photo: IG _itswilbertross

Late ang pasasalamat ni Wilbert Ross sa mga nanood ng kanyang first concert. Ngayon lang daw kasi nag-sink in sa kanyang isip ang naganap noong dalawang gabi siyang nagtanghal.

Hindi sukat-akalain ng aktor na magiging matagumpay ang kanyang concert na ginanap kamakailan sa New Frontier Theater. Dahil sa sold-out na ticket at sa kagustuhang mapagbigyan ang lahat ng kanyang mga tagahanga, nagdagdag pa sila ng isang gabi ng pagtatanghal.

Sa social media ni Wilbert, isang mahabang mensahe ang kanyang isinulat kung saan binalikan niya ang kanyang pinagdaanan bago naabot ang tagumpay.

Sinimulan niya ito sa pagpapakilala sa sarili.

Aniya, “Hi, ako nga pala si Wilbert Rosalyn (totoo niyang pangalan). Isang nangangarap mula sa Hagonoy, Davao del Sur.”

Aniya, sa isang dekadang nagdaan, isa siyang probinsyano na sumuong sa Maynila para abutin ang pangarap. Sumubok sa iba’t ibang pagkakataon para magkaroon ng puwang sa industriya.

Pahayag ni Wilbert, “‘Di naging madali ang aking pinagdaanan. Maraming pagsubok ang dumating, pero isang bagay ang hindi kailanman nawala—ang apoy sa puso ko at ang matinding kagustuhang maabot ang aking mga pangarap.

“Dati, baka isipin ng iba na isa lang akong dakilang ‘manifestor’ sa social media. Pero sa likod ng lahat ng ‘yun, tahimik kong binubuo ang bawat hakbang. Pinaghirapan ko ang lahat, pinag-isipan ang bawat desisyon, at naghanda para sa tamang panahon.

“At nang dumating ang pagkakataon… handang-handa na ako.

“Ang dati’y pangarap lamang na makakanta sa isang malaking concert venue at marinig kayong sabay-sabay na umaawit ng mga isinulat kong kanta ay natupad na.

“Mula sa puso ng isang probinsyanong nangarap, maraming-maraming salamat sa inyo na pumunta, nakiisa sa pag-awit, naiyak, at naging bahagi ng dalawang gabing hinding-hindi ko malilimutan. Kayo ang naging patunay na ang mga pangarap at manifestation ay puwedeng maging realidad. Maraming salamat sa inyong tiwala. Hanggang sa muli nating pagkikita at pagkanta!”

Pinasalamatan din niya ang lahat ng taong tumulong upang maisakatuparan ang kanyang concert — mula sa Viva Artists Agency, Viva Records at mga executives nito, sa kanyang handler at production team, direktor, atbp., gayundin ang lahat ng kanyang guest performers.

Personal din niyang pinasalamatan ang kanyang kaibigang si Mika Salamanca, ang mga dati niyang kasama sa Hashtags, si Bea Binene at si Vice Ganda, na matagal nang naniniwala sa kanyang kakayahan, gayundin ang kanyang glam team, pamilya, mga kaibigan, at higit sa lahat, ang kanyang mga tagahanga — ang kanyang ‘Fanmily’ — na patuloy na sumusuporta sa kanya.

Sey ng mga netizens:

“Simula pa lang ito ng Team Wilbert! Congrats sa ating lahat!”

“It’s been 5 years since we broke up. You said after natin maghiwalay baka ‘di mo kayanin ‘pag wala ako, but look at you now, little by little mo nang naaabot ang mga pangarap mo. Congrats, babe!" ani ng isang nagngangalang Farah Lopez.

“Bea Binene, Wilbert Ross. Ikaw at si Bea ang isa sa pinakamalaking inspirasyon ko. ‘Di lang basta kilig ang naibibigay n’yo sa akin, pati eyebags dahil sa rodeo dance mo. Hahaha!”

“I love how he mentioned ‘to THE Bea Binene.’ Taas ng respect talaga n’ya sa isang Bea Binene. ‘Kala ko nga ‘to my,’ pero ‘to THE’ talaga, big letters pa ang ‘THE’. Ang galing. Iba ‘yun! With high respect and honor! ‘Di lang basta love team.”