Pangangasiwa ng water supply sa subdivision

ni Atty. Persida Rueda-Acosta - @Magtanong Kay Attorney | April 10, 2021

Dear Chief Acosta,

Obligado ba ang aming homeowner’s association na i-administer ang supply ng tubig ng aming subdivision? – Bebs

Dear Bebs,

Para sa inyong kaalaman, ang batas na nakasasaklaw sa inyong sitwasyon ay ang Section 10 (g) ng Republic Act (R. A.) No. 9904, o mas kilala sa tawag na The Magna Carta for Homeowners and Homeowners’ Associations, kung saan nakasaad na:

“Section 10. Rights and Powers of the Association. – An association shall have the following rights and shall exercise the following powers:

x x x

(g) Ensure the availability of quality water services at a reasonable price and at its option, administer and manage the waterworks system of the subdivision;” (Binigyang-diin)

Samakatwid, hindi obligado, ngunit binibigyan ng batas ng kapangyarihan ang homeowners’ association upang pangasiwaan ang water service ng kanilang subdivision.

Ibig sabihin, maaaring pangasiwaan ng inyong homeowners’ association ang supply ng tubig sa inyong lugar, kung ito ay kanilang nanaisin.

Sana ay nabigyan namin ng linaw ang inyong katanungan. Ang payong aming ibinigay ay base lamang sa impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.