Pananagutan ng nagnakaw na kasama sa bahay

ni Atty. Persida Rueda-Acosta @Magtanong Kay Attorney | Pebrero 20, 2023

Dear Chief Acosta,

Noong isang araw, habang nag-aayos ako ng aking mga alahas, napansin kong nawawala ang isang pares ng hikaw at isang singsing ko. Hindi ko lubos maisip na mawawalan ako ng gamit, sapagkat mga kapamilya ko lamang ang kasama ko sa bahay. Ang nakakalungkot pa, hindi ito ang unang beses na naganap ang ganitong pangyayari. Alam kong mahirap magparatang nang walang ebidensya o basehan.

Kaya, matapos ang unang insidente, naglagay ako ng CCTV sa kuwarto. Nang suriin ko ang footage, nakumpirma ko na ang kumuha ng aking mga alahas ay ang hipag ko na kasama ko rin sa bahay. Nang kumprontahin ko siya, siya pa ang galit sa akin. Ano ang maaaring maisampa kong kaso laban sa kanya? Maraming salamat. – Kath

Dear Kath,

Para sa iyong kaalaman, ang batas na nakasasaklaw sa iyong katanungan ay ang Article 332 ng Revised Penal Code, kung saan nakasaad ang mga sumusunod:

“ART. 332. Persons exempt from criminal liability. – No criminal, but only civil liability shall result from the commission of the crime of theft, swindling, or malicious mischief committed or caused mutually by the following persons:Spouses, ascendants and descendants, or relatives by affinity in the same line;

1. The widowed spouse with respect to the property which belonged to the deceased spouse before the same shall have passed into the possession of another; and

2. Brothers and sisters and brothers-in-law and sisters-in-law, if living together.

The exemption established by this article shall not be applicable to strangers participating in the commission of the crime.”

Ayon sa nabanggit na batas, walang kriminal – ngunit tanging sibil – na pananagutan ang magreresulta mula sa pagnanakaw, kung ang nakagawa nito ay alinman sa mga nabanggit na kamag-anak tulad ng iyong hipag na kasama mong naninirahan sa iisang bahay.

Ang pangunahing layunin ng nasabing batas ay upang mapanatili ang pagkakasundo ng pamilya.

Kaya, nililimitahan ng nasabing probisyon ang responsibilidad ng nagkasala sa pananagutang sibil at tinatanggalan siya ng pananagutang kriminal sa bisa ng kanyang kaugnayan sa nasaktang partido. Tandaan na ang mga kasong theft, swindling, at malicious mischief lamang ang sakop ng nasabing probisyon ng batas. Kung ang krimen na ginawa ay robbery, magkakaroon pa rin ng kriminal na pananagutan ang nagkasala.

Sana ay nabigyan namin ng linaw ang iyong katanungan. Ang payong aming ibinigay ay base lamang sa mga impormasyon na iyong inilahad at maaaring magbago kung mababawasan o madaragdagan ang mga detalye ng iyong salaysay.

Maraming salamat sa inyong patuloy na pagtitiwala.