Pananagutan ng isang guarantor

ni Atty. Persida Rueda-Acosta - @Magtanong Kay Attorney | March 30, 2022

Dear Chief Acosta,

Ang aking pinsan ay nangutang sa kanyang kaibigan. Ako po ay pumirma bilang kanyang guarantor. Nang ayaw niya magbayad ay ako na ang sinisingil ng kanyang pinagkakautangan. Maaari po ba iyon?

Lexie

Dear Lexie,

Ang batas na sumasaklaw patungkol sa inyong katanungan ay ang Republic Act (R. A.) No. 386 o kinikilala bilang New Civil Code of the Philippines. Ayon sa Article 2058 ng batas na ito:

“Art. 2058. The guarantor cannot be compelled to pay the creditor unless the latter has exhausted all the property of the debtor, and has resorted to all the legal remedies against the debtor.”

Kaugnay nito, inilahad ng Korte Suprema sa kaso ng Aglibot vs. Santia (G.R. No. 185945, 05 December 2012, Ponente: Honorable Former Associate Justice Bienvenido L. Reyes) ang sumusunod:

“It is settled that the liability of the guarantor is only subsidiary, and all the properties of the principal debtor, the PLCC in this case, must first be exhausted before the guarantor may be held answerable for the debt. Thus, the creditor may hold the guarantor liable only after judgment has been obtained against the principal debtor and the latter is unable to pay, "for obviously the ‘exhaustion of the principal’s property’ — the benefit of which the guarantor claims — cannot even begin to take place before judgment has been obtained." This rule is contained in Article 2062 of the Civil Code, which provides that the action brought by the creditor must be filed against the principal debtor alone, except in some instances mentioned in Article 2059 when the action may be brought against both the guarantor and the principal debtor.”

Ayon sa probisyon ng nasabing batas at sa desisyon ng Korte Suprema, ang isang guarantor ay maaari lamang panagutin sa pagkakautang sa bisa ng desisyon ng korte, na kung saan, ang taong nagkautang ay bigong magbayad. Bago mapanagot ang isang guarantor, marapat na ang lahat ng ari-arian ng taong nagkautang ay naubos na, at ang lahat ng maaaring legal na hakbang laban sa kanya ay nagawa na ng taong pinagkakautangan niya ngunit bigo pa rin na mabayaran.

Sana ay nabigyan namin ng linaw ang inyong katanungan. Ang payong aming ibinigay ay base lamang sa mga impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.