Pamamahagi ng ayuda sa mga magsasaka at mangingisda

ni Bong Revilla @Anak ng Teteng | July 15, 2024

Isang pagsaludo ang ating inihahandog kay Pangulong Ferdinand R. Marcos, Jr. (PBBM) matapos natin siyang personal na makasamang pangunahan ang direktang pamamahagi ng cash assistance para sa mga magsasaka, mangingisda, at kanilang mga pamilya sa lalawigan ng Cavite, noong Huwebes ng umaga, Hulyo 11.

Sa isinagawang distribusyon ng Presidential Assistance to Farmers, Fisherfolks and their Families (PAFFF) sa Dasmariñas City, 12,000 benepisyaryo ang nabiyayaan ng P10,000 cash assistance sa pamamagitan ni PBBM, mula sa Ayuda sa Kapos ang Kita (AKAP) Program ng Department of Social Welfare and Development (DSWD).

Labis akong nagpapasalamat sa Pangulong Marcos sa kanyang pagmamalasakit sa ating mga kababayan dito sa Cavite, lalo na sa mga magsasaka at mangingisda kabilang na rin ang kanilang mga pamilya. Damang-dama ng mga Caviteño kung paano inilapit ng Pangulo ang gobyerno patungo sa tao sa pamamagitan ng direktang pamimigay ng tulong pinansyal.

Napakaimportante ng sektor na siyang tinutumbok nitong PAFFF – ang ating mga food producer. Sila ang mga nagsisigurado na mayroong pagkain sa hapag ng bawat Pilipino. Sila ang susi para tayo ay patuloy na maging sustainable sa supply ng pagkain.

Dinaluhan din ng mga kongresista ng lalawigan ng Cavite ang naturang okasyon. Sa pamamagitan nila ay naabutan ang bawat benepisyaryo ng tig-5 kilong bigas.

Hindi rin malilimutan ng mga taga-Cavite ang naging partisipasyon ng national government agencies katulad ng Department of Agriculture, Department of Labor and Employment, Department of Trade and Industry, at ng Technical Education and Skills Development Authority na dumalo sa nasabing programa.

Kung naging masaya ang aking mga kababayan sa Cavite ay higit akong naging maligaya dahil nakita ko ang taglay na kasiyahan sa kanilang mga mukha.    

Nakakataba naman talaga ng puso na ang mga kababayan nating nagsusumikap para magkaroon ng makakain ang bawat pamilyang Pilipino tulad ng bigas at isda ay sila namang napagtuunan ng pansin kahit paminsan-minsan.

Sila kasi ang sektor na wala nang iniisip araw-araw kundi ang makapaghatid ng mga huling isda sa pamilihan at makapag-ani ng dekalidad na bigas para sa bawat Pinoy.

Kaya ang pag-alalang ito ni PBBM ay isang hindi makalilimutang pangyayari sa lalawigan ng Cavite na minsan ay dinaluhan sila ng mismong Pangulo ng bansa sa kanilang buhay.

Kaya muli para kay PBBM, bilang kabahagi ng mga taga-Cavite, maraming salamat — hanggang sa uulitin!

Anak Ng Teteng!

---

May katanungan ka ba, reklamo o nais ihingi ng tulong? Sumulat sa ANAK NG TETENG! ni BONG REVILLA sa BULGAR Bldg., 538 Quezon Ave., Quezon City o mag-email sa anak­ng­teteng.bulgar@ gmail.com