Palaos na, nakabawi pa… LIZA, NAGKA-ENDORSEMENT SA PAG-IINGAY SA ISYU NILA NI OGIE

ni Erlinda Rapadas @Teka Nga | March 21, 2023

Mukhang nakatulong sa career ni Liza Soberano ang isyu niya sa dating manager na si Ogie Diaz at sa ABS-CBN Star Magic, kung kaya't kinuha siya ngayon ng isang financial technology firm na Maya upang maging brand ambassador.

At kasabay ng kanyang pagtanggap sa offer ay hiniling niyang bigyan siya ng titulo bilang “Chief Advocacy Officer”.

Itinuturing kasi ni Liza na advocacy ang ipaglaban ang karapatan at huwag maging sunud-sunuran sa dikta ng mga tao sa kanyang paligid.

Gusto niyang ipakita sa lahat ang tunay na Liza Soberano na hindi nila nakita noong magka-love team pa sila ni Enrique Gil. ‘Yun ang pagbabagong aabangan sa kanya ng lahat bilang si Hope Soberano.

Ang tanong ngayon, mapapantayan o malalagpasan ba ni Liza ang kanyang popularidad noon bilang artista ng Star Magic?

Papaano niya ipa-package ang kanyang sarili bilang Hope Soberano?