Pagdadala ng armas sa Pilipinas mula sa ibang bansa

ni Atty. Persida Rueda-Acosta - @Magtanong Kay Attorney | September 29, 2022

Dear Chief Acosta,

Ang kapatid ko ay uuwi ng Pilipinas at dala niya ang kanyang dalawang baril na may rehistro at lisensya sa Amerika, ngunit hindi lisensyado sa Pilipinas. Ano ang dapat niyang gawin? - Carissa

Dear Carissa,

Para sa iyong kaalaman, ang iyong katanungan ay binigyang-linaw ng Republic Act No. (RA No.) 10591 o kinikilala bilang "Comprehensive Firearms and Ammunition Regulation Act" Nakasaad sa Section 22 ng RA No. 10591 na:

“SEC. 22. Deposit of Firearms by Persons Arriving From Abroad. – A person arriving in the Philippines who is legally in possession of any firearm or ammunition in his/her country of origin and who has declared the existence of the firearm upon embarkation and disembarkation but whose firearm is not registered in the Philippines in accordance with this Act shall deposit the same upon written receipt with the Collector of Customs for delivery to the FEO of the PNP for safekeeping, or for the issuance of a permit to transport if the person is a competitor in a sports shooting competition. If the importation of the same is allowed and the party in question desires to obtain a domestic firearm license, the same should be undertaken in accordance with the provisions of this Act. If no license is desired or leave to import is not granted, the firearm or ammunition in question shall remain in the custody of the FEO of the PNP until otherwise disposed of in-accordance with law.”

Alinsunod sa nabanggit na probisyon ng batas, ang sinumang pupunta sa Pilipinas na may dalang armas na kanyang legal na pagmamay-ari sa ilalim ng umiiral na batas sa bansang kanilang pinagmulan at idedeklara ito sa kanyang pagdating sa Pilipinas ay marapat na ideposito ang nasabing armas sa Collector of Customs na siyang maghahatid ng mga armas sa Firearms and Explosives Office (FEO) ng Philippine National Police (PNP) para sa ligtas na kustodiya nito. Kung ang dahilan ng pagdadala ng armas sa Pilipinas ay ang paglahok sa sports shooting competition, ang nasabing armas ay maaaring mabigyan ng permit to transport ng PNP.

Samantala, kung ang pag-aangkat ng kanyang dalang armas ay pinahihintulutan ng ating batas, ito ay maaaring magawaran ng lisensya alinsunod sa probisyon ng RA No. 10591. Subalit, kung hindi niya nanaisin na ito ay mabigyan ng lisensya o ang pag-angkat ng kanyang armas ay hindi pinahintulutan, ang nasabing armas ay mananatili lamang sa kustodiya ng FEO ng PNP maliban kung ito ay ipasira o ipatapon alinsunod sa batas.

Sana ay nabigyan namin ng linaw ang inyong katanungan. Ang payong aming ibinigay ay base lamang sa impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.