₱604 M buwis sa pabango, hinahabol ng BIR

ni Eli San Miguel - Trainee @News | October 16, 2023

Pinagbabayad ng Bureau of Internal Revenue (BIR) ang mga nag-i-import, gumagawa at nagdi-distribute ng mga pabango at toiletry products ng kanilang kabuuang utang sa buwis na umaabot na sa higit sa P604 milyon.

Inilabas ni Commissioner Romeo D. Lumagui Jr. ang direktibang ito matapos ang isinagawang inventory kung saan higit sa 390,000 bote ng mga kontrabando ang nakumpiska sa kasagsagan ng enforcement operation sa buong bansa na nakatutok sa 400 pasilidad, bodega, at tindahan sa Metro Manila at iba pang mga rehiyon. Binigyang-diin ni Lumagui sa isang pahayag sa media na "Regardless of the size of the business, all must adhere to excise tax regulations."

Ayon sa Revenue Regulations No. 9-2023, “Any individual or legal entity planning to enter this business must submit a written application for a permit to engage in such activities to the Large Taxpayers Service (LTS) of the BIR.”

Binigyang-linaw ni Revenue Assistant Commissioner Jethro M. Sabariaga ng LTS na ang pagkuha ng permit para sa buwis ay iba sa requirement para sa BIR Certificate of Registration.

Idiniin din niya na ang mga operators ng negosyo na tumanggi o hindi nagbayad ng kanilang utang sa buwis ay kakasuhan sa korte para sa tax evasion.