50% dagdag-taripa, ban sa mga produkto, etc... U.S.-Canada trade war, lumala

ni Justine Berganio @Overseas News | September 10, 2026

Photo: Pres. Donald Trump at Canadian Prime Minister Mark Carney - FB Donald Trump, The Canadian Press via AP

Lumala ang trade war ng Estados Unidos at Canada matapos ipagbawal ng administrasyong Trump ang pagpasok ng karamihan sa Canadian alcohol, motorcycles, whey, molasses at nonalcoholic beer simula Setyembre 29.

Kasabay nito, magpapataw ang US ng dagdag na 50% tariff sa Canadian cheese, steel, aluminum at bamboo furniture simula sa susunod na Martes.

Ang hakbang ay tugon umano sa $20 bilyong (P1.25T) tariff ng Canada sa mga produktong Amerikano, matapos ding patawan ng US ng kaparehong halaga ang Canadian goods.

Sinabi ng White House na hindi umano nakipagnegosasyon nang maayos ang Canada at hindi inalis ang ilang trade barriers. Nangako naman si Canadian Prime Minister Mark Carney na tutumbasan ng Canada ang US tariffs.

Nagbanta rin si Trump ng 50% tariff sa lahat ng Canadian automotive imports, trucks, auto parts at steel pagsapit ng Enero 1, 2027 kung walang magiging kasunduan.

Ipinagbawal din ni Trump ang Canadian-made products sa federal government contracts hangga’t hindi umano binubuksan ng Canada ang merkado nito sa US.

Target din ng banta ni Trump ang Canadian aircraft maker na Bombardier, ngunit sinalungat ito ng ilang Republican senators dahil sa libu-libong trabaho nitong nalilikha sa US, kabilang ang mahigit 1,200 trabaho sa Kansas.

Atras sa kompetisyon, mga planta magsasara... 100K trabaho sa Volkswagen, nanganganib sa 2030

ni Justine Berganio @Overseas News | September 5, 2026

Photo: Volkswagen cars - Indux - Circulated

Umaabot sa 100,000 trabaho ang posibleng mawala sa Volkswagen pagsapit ng 2030 matapos palawakin ng German carmaker ang cost-cutting program nito dahil sa lumalalang kompetisyon mula sa China at epekto ng US tariffs.

Inaprubahan ng management at labor unions ang dagdag na 50,000 job cuts, bukod pa sa 50,000 na nauna nang napagkasunduan. Katumbas ito ng tinatayang 15% ng

kabuuang workforce ng kumpanya.

Mahigit 650,000 katao ang empleyado ng Volkswagen Group sa iba’t ibang brands nito, kabilang ang Audi, Bentley, Skoda, Seat, Porsche, Cupra at Lamborghini.

Kasabay ng pagbabawas ng mga empleyado ang plano ng kumpanya na hatiin sa kalahati ang bilang ng mga car model na ginagawa nito upang mabawasan ang gastos at mapalakas ang operasyon.

Posible ring magsara ang apat na planta sa Germany na matatagpuan sa Hanover, Emden, Zwickau at Neckarsulm. Ayon sa kumpanya at mga unyon, hindi pa matitiyak ang operasyon ng mga ito pagsapit ng 2030s.

Sinabi ng Volkswagen na kailangan nitong iayon ang bilang ng mga manggagawa sa

kasalukuyang kalagayan ng negosyo.

Matapos ang mahabang pag-uusap, tuluyang inaprubahan ng supervisory board ang restructuring plan ng kumpanya. Ayon kay CEO Oliver Blume, mahalagang hakbang ito para sa kinabukasan ng Volkswagen.

Noong nakaraang buwan, hinarap ni Blume ang pagkadismaya ng ilang empleyado matapos siyang i-boo habang bumibisita sa headquarters ng kumpanya sa Wolfsburg, Germany.

Lumalaki ang problema ng Volkswagen sa European market dahil sa agresibong kompetisyon ng Chinese carmakers, habang bumababa rin ang sales nito sa China.

Dagdag pasanin din sa kumpanya ang US tariffs, bukod sa matagal nang problema nito sa sobrang produksyon at paghina ng kita sa Europe.

Hindi lang Volkswagen ang tinatamaan ng hirap sa Chinese market. Nakaranas din ng pressure ang ibang malalaking automakers, kabilang ang BMW, na kinailangang ibaba ang profit guidance nila dahil sa mga problema sa Chinese market at sa epekto ng Iran war.

Pinakamataas sa kasaysayan... Piso sadsad sa P62.56 vs. dolyar

by Jeff Tumbado @News | September 3, 2026

Photo: File

Bumagsak ang halaga ng piso sa panibagong record low na P62.565 laban sa US dollar nitong Miyerkules, Setyembre 2.

Pero bago ito, unang sumadsad pa ang piso sa all-time low na P62.69 kada dolyar sa intraday trading bago bahagyang nakabawi at nagsara sa P62.565.

Noong Martes, Setyembre 1, nagtala rin ang piso ng record-low close na P62.40 kada US dollar.

Matapos lumampas ang piso sa P62 kada dolyar noong nakaraang Biyernes, sinabi ng Bangko Sentral ng Pilipinas (BSP) na patuloy nitong mino-monitor ang foreign exchange market.

Ang patuloy na paghina ng piso ay maaaring magpamahal sa mga inaangkat na produkto, kabilang ang langis at iba pang pangunahing bilihin, na maaaring magdagdag ng pressure sa inflation.

Sa kabilang banda, maaaring makinabang sa maikling panahon ang mga pamilya ng overseas Filipino workers (OFWs) dahil mas maraming piso ang katumbas ng bawat dolyar na ipinapadala nila sa Pilipinas.

Gayunman, maaaring mabawasan din ang tunay na halaga ng kanilang perang ipinapadala dahil sa pagtaas ng presyo ng mga bilihin, na maaaring kumain sa kanilang purchasing power.