P20M imported rice, nasabat

ni Janice Baricuatro @News | October 15, 2026

Photo: CIDG / PNP

Nasamsam ng mga awtoridad ang 16,492 sako ng pinaghihinalaang ilegal na imported rice na nagkakahalaga ng P20 milyon sa isang bodega sa Brgy. Malainen Bago, Naic, Cavite, kamakalawa.

Bandang alas-11 ng umaga nang salakayin at inspeksiyunin ng CIDG Regional Field Unit 4A, katuwang ang Bureau of Customs (BOC) at iba pang ahensiya, ang naturang bodega sa bisa ng Letter of Authority (LOA) mula sa BOC.

Pinaghihinalaang ginagamit ang pasilidad sa ilegal na paghahalo ng imported at lokal na bigas nang walang kaukulang pahintulot at tamang deklarasyon. Tumagal ang operasyon hanggang alas-9:30 ng gabi, kung saan nakumpiska ang libu-libong sako ng bigas.

Patuloy ang imbestigasyon upang matukoy ang may-ari at mga nasa likod ng pinaghihinalaang ilegal na operasyon.