Ang sa DOJ: Ibalik ang imbestigasyon ng CIDG sa kaso ng mga nawawalang sabungero

by Info @News | October 18, 2025

Photo:Atong Ang / DOJ

Hiniling ng negosyanteng si Charlie 'Atong' Ang sa Department of Justice (DOJ) na ibalik sa Philippine National Police-Criminal Investigation and Detection Group (PNP-CIDG) ang imbestigasyon ng kaso ng mga nawawalang sabungero.

Sa kanyang sinumpaang salaysay na isinumite sa DOJ, si Ang, sa pamamagitan ng kanyang abogadong si Gabriel Villarreal, iginiit niyang ibalik ang kaso sa CIDG para sa wasto at walang kinikilingang imbestigasyon.

Sinabi ni Gabriel na tanging isang kapani-paniwalang reinvestigation ng kaso ng pulisya ang hahantong sa isang matibay na pagbuo ng kaso ng DOJ panel, na katanggap-tanggap sa lahat ng partido.

Kasama ang kanyang mga abogado, lumantad si Ang sa DOJ upang ihain ang kanyang sinumpaang kontra-salaysay na nagpapabulaan sa lahat ng mga paratang na ibinato laban sa kanya ng nagpakilalang whistleblower na si Julie "Dondon" Patidongan.

Sinabi ni Gabriel na walang sala si Ang sa lahat ng mga akusasyon na ibinato sa kanya ni Patidongan, na sinabi nilang tunay na utak ng karumal-dumal na krimen.

Pakikipaghiwalay sa BF na pulis, posibleng rason sa pagkawala ni Catherine Camilon — CIDG

ni Angela Fernando - Trainee @News | November 14, 2023

Nagsampa ng reklamong kidnapping at serious illegal detention laban sa mga suspek na sangkot sa pagkawala ng kandidata sa pagka-beauty queen na si Catherine Camilon.

Kabilang sa mga suspek ang sinasabing karelasyon ng biktima na si Police Major Allan de Castor, at driver- bodyguard niyang si Jeffrey Magpantay.

May dalawa pang kasabwat ang mga suspek na hindi pa nakikilala.

Ayon sa direktor ng Criminal Investigation and Detection Group (CIDG), na si Police Major General Romeo Caramat Jr., sinasabing kikitain ni Camilon si De Castro nang araw na mawala ito nu'ng Oktubre sa Batangas.

Aniya, nais na raw makipaghiwalay ni Camilon sa pulis na puwedeng naging rason ng kanilang pag-aaway.

Kasalukuyang nasa kostudiya ng mga awtoridad si De Castro at pinaghahanap pa si Magpantay na umano'y nanutok ng baril sa mga saksi ng ginawa nilang paglipat kay Camilon sa ibang sasakyan.

Kinumpirma ng mga saksi na ang beauty queen ang nakita nila at parehas ang sasakyan nito sa lumabas sa mga report.

Hindi pa nakikita ang sasakyan ng biktima at umaasa ang mga awtoridad na buhay pa si Camilon.

Catherine Camilon, nakitang duguan, 3 suspek inginuso

ni Angela Fernando - Trainee @News | November 9, 2023

Nakitang duguan habang inililipat sa sasakyan ang nawawalang kandidata ng Miss Grand Philippines 2023 na si Catherine Camilon, ayon sa mga awtoridad.

Ayon kay Major General Romeo Camarat Jr., direktor ng Criminal Investigation and Detection Group (CIDG), dalawang saksi ang lumitaw na nagsasabing nakita nila ang beauty queen nu'ng gabi ng Oktubre 12.

Nakita diumano ng dalawang saksi na inililipat ang duguang si Camilon sa isa pang sasakyan ng tatlong hindi kinilalang lalaki at isa rito ay tinutukan sila ng baril.

Kinumpirma ng pulisyang nakilala ang isang gunman sa rogue's gallery ng CIDG dahil sa hitsura nito at mga tattoo sa katawan.

Matatandaang pumutok ang pagkawala ng kandidata kamakailan nang lumapit ang kanyang ina sa isang programa sa radyo at nanawagang bumalik na ang kanyang anak sa kanilang tahanan.