P12M smuggled na sibuyas, nasamsam — BOC

ni Lolet Abania | July 21, 2022

Nasa P12 milyon halaga ng mga puslit na produktong agrikultura ang naharang ng mga awtoridad sa Tagoloan, Misamis Oriental, ayon sa Bureau of Customs (BOC) ngayong Huwebes.

Sa isang statement, sinabi ng BOC na nakasabat sila ng apat na container ng puti at pulang sibuyas na misdeclared bilang “Spring Roll Patti” sa Mindanao Container Terminal Port nitong Martes.

Ang naturang produkto ay naka-consigned sa Primex Export and Import Producer at dumating sa bansa mula sa China noong Hulyo 12.

Nag-isyu na si District Collector Elvira Cruz ng pre-lodgment control order laban sa shipments.

Ayon sa BOC, nakatakda na ring maglabas ng isang warrant of seizure at detention laban dito dahil sa paglabag sa Republic Act 10863 o ang Customs Modernization and Tariff Act.

“This is the second seizure of the Port of Cagayan de Oro in less than two weeks,” pahayag ng BOC.

Sa ilalim ng batas, dapat mayroon ang mga importers ng kinakailangang mga permits mula sa BOC at sa Department of Agriculture (DA).

Kaugnay nito, ang BOC ay may mandato na i-assess at kumolekta ng customs revenues mula sa mga imported goods at magsagawa ng border control para mapigilan ang pagpasok ng mga smuggled goods.