Dahil ‘nagpapakalat’ ng fake news… Jay Sonza, nasa kustodiya ng NBI

by Lolet Abania @News | May 1, 2026

Photo: Jay Sonza - National Bureau of Investigation

Magpapalipas ng mahabang weekend ang dating broadcaster na si Jay Sonza sa kustodiya ng National Bureau of Investigation (NBI) matapos itong arestuhin dahil sa umano’y pagpapakalat ng fake news tungkol sa kalusugan ni Pangulong Ferdinand Marcos, Jr.

Ayon kay NBI Director Melvin Matibag, inaresto si Sonza nitong Huwebes ng gabi, Abril 30, makaraang kasuhan ng paglabag sa Article 154 ng Revised Penal Code, kaugnay ng Cybercrime Prevention Act, dahil sa pagpapakalat ng pekeng medical bulletin tungkol sa Pangulo.

Aniya, bagama’t nakasaad sa warrant of arrest na non-bailable ang krimen, kailangan itong i-cleared kapag iniharap si Sonza sa Pasay Regional Trial Court sa Lunes, May 4. Ito ay dahil sarado ang mga korte sa bansa ngayong Mayo 1, Labor Day, isang regular holiday.

“Nu’ng na-enforce po ‘yung warrant gabi, alas-otso na po, sarado na ‘yung korte, at nagkataon holiday po ngayon. Tapos Sabado Linggo, so sa Lunes po talaga… Dadalhin po natin si Jay Sonza diyan pagbukas nitong Lunes,” ani Matibag .

Sinabi rin ni Matibag na papayagan naman ang abogado ni Sonza na bisitahin siya sa NBI facility.

UP student, kabilang sa mga napatay sa ‘sagupaan’ sa Negros Occidental

ni Lolet Abania @News | April 23, 2026

Photo: File / Circulated / UP Diliman Student Council

Isang student leader mula sa University of the Philippines (UP) Diliman ang kabilang sa 19 na napatay sa tinatawag ng militar na ‘engkuwentro’ sa mga rebeldeng New People’s Army sa Toboso, Negros Occidental noong Linggo, Abril 19, ayon sa UP Diliman University Student Council (USC).

Sa isang pahayag, sinabi ng UP Diliman USC na si Alyssa Alano, Education and Research councilor ng USC, ay kabilang sa mga namatay nang pinaputukan umano ng 79th Infantry Battalion ng 3rd Infantry Division ang isang komunidad sa Barangay Salamanca sa Toboso.

“Noong Abril 19, walang habas na pinaulanan ng bala ng 79th Infantry Battalion ng Armed Forces of the Philippines (AFP) ang Barangay Salamanca, Toboso, Negros Occidental kung saan halos 168 na pamilya at 653 na indibidwal ang napilitang magbakwit sa kanilang mga tahanan,” batay sa kanilang statement, kung saan ang pahayag ay hindi tumutukoy sa insidente bilang isang engkuwentro o sagupaan.

“Kaugnay nito, ibinabalita ng UP Diliman University Student Council na isa sa mga nasawi ang ating kapwa Iskolar ng Bayan na si USC Councilor Alyssa Alano dahil sa pasistant atake at panunupil ng militar sa Negros,” anito.

Noong Lunes, iniulat ng Philippine Army na 19 umano’y miyembro ng NPA ang napatay sa isang engkuwentro sa 79th Infantry Battalion ng 3rd Infantry Division sa Barangay Salamanca sa Toboso, Negros Occidental noong Linggo.

Forest fire, sumiklab sa bahagi ng Sierra Madre sa Laguna

ni Lulet Abania @News | April 22, 2026

Photo: Mark Angelo Cadapan / Circulated

Sumiklab ang isang forest fire nitong Martes ng gabi, Abril 21, sa isang bahagi ng kabundukan ng Sierra Madre sa Kalayaan, Laguna, na agad namang nakontrol, ayon sa Bureau of Fire Protection (BFP).

Base sa naka-witness, bandang alas-8 ng gabi nagsimula ang sunog.

Sinabi naman ni SFO4 Jessus Andres Jr. ng BFP ng lalawigan, idineklarang under control ang sunog pasado alas-10 ng gabi, at hanggang ala-1 ng hatinggabi ng Miyerkules, maliliit na portion na lamang ng apoy ang natitira habang ang mga bumbero ay patuloy ang operasyon.

Idinagdag pa ni Andres na nahirapan umano ang mga bumbero na tuluyang apulahin ang apoy sa naturang bahagi ng bundok dahil ito ay matarik at may mga bangin.