Open Billing, mahusay sa 2-YO Maiden Race

ni Green Lantern - @Renda at Latigo |October 24, 2022

Ipinakita agad ni Open Billing ang kanyang husay nang manalo sa 2022 PHILRACOM "2-Year-Old Maiden Race na pinasibat sa Metro Turf, Malvar - Tanauan City, Batangas, kahapon.

Ginabayan ni jockey AR Villegas, inilista ni Open Billing ang tiyempong 1:26 minuto sa 1,400 meter race upang hamigin ng winning horse owner na si BC Abalos ang added prize na P20,000.

Dumating na segundo si Winner Parade habang 3rd at 4th placers sina Player Andri at Mmake Or Break ayon sa pagkakasunod.

Ayon sa mga nakasaksing karerista, nakapanood agad sila ng magandang karera, pinakawalan ang mga kabayo sa race 1. "Natalo ako kasi dehadista ako, pero sulit naman kasi ang ganda ng ipinakita ng nanalong kabayo, sa susunod tatayaan ko na siya," saad ni Carlito de Guzman, veteran karerista.

Samantala, si Life Gets Better naman ang nagpakitang gilas sa pangalawang karera.

Nasikwat ni Life Gets Better ang panalo sa PHILRACOM Rating Based Handicapping System, nirendahan siya ni RD Raquel.

Dumating na segundo si Security Supreme habang tersero si Copy Cat na sinakyan ni Rodeo Fernandez. Inirehistro ni Life Gets Better ang 1:25 minuto sa 1,400 meter race sa event na suportado ng Philippine Racing Commission, (PHILRACOM) sa pamumuno ni chairman Reli de Leon.