Omega Esports, na-lift na ang ban para sa DOTA 2 competition

ni Gerard Arce - @Sports | December 08, 2021

Tinanggal na ng Valve Esports ang ipinataw na pagbabawal sa SMART Omega Esports sa paglahok sa anumang DOTA 2 organized competition events mula sa kontrobersiyal na match-fixing incident na naganap sa isang Asian Arena tournament na kinasasangkutan ng coach at mga manlalaro nito.

Kinumpirma at nilinaw ni SMART Esports General Manager Chris “Epok” Quimpo na tinanggap at napagdesisyunan ng VALVE organization ang ipinadalang liham ng pagpapaliwanag kasunod ng naturang ‘ban’ sa koponan para sa DOTA 2 lamang at hindi sa lahat ng mga Esports event na nasasakupan nito.

Inamin ng dating Ateneo de Manila University court general na umapila sila sa pamunuan ng VALVE matapos masangkot sa umano’y match-fixing ang coach at mga players sa torneo ng O.B. Moon Studio Asian Arena tournament.

“Just to be clear yung ban na ipinataw ng Valve is for Dota 2 only, dahil dun nagkamali, after that appeal that we submitted, ipinakita namin yung scenarios, we explained what happened formally, so I think nung binalikan na kami na-lift na yung ban sa Omega, and that is good news not only for the club, but also sa DOTA community, we really want to be part of the community and make eventually,” pahayag ni Quimpo, Huwebes ng umaga sa weekly TOPS Usapang Sports on Air.

Inamin mismo ng coach ang pagkakamali at hindi inaasahang maglalabas agad ng aksyon at anunsyo ang VALVE hinggil sa nangyaring insidente. “Mayroong nagkamali eh, yung aming head coach which he admitted and it was reported to VALVE, so nung naglabas ng initial statement si VALVE, kasama kaagad lahat, yun yung inappeal namin. But in this case, nakita namin sa VALVE na there is due process after appealing. May nagkagulatan dun sa announcement, but at least we appeal and after presented our stand, pinakinggan naman yung side ng club. Yun ang kagandahan na I think na mangyayari sa Esports dahil nagkakaroon na ngayon ng proseso, nagkakaroon na ng levels na pwedeng pagusapan kapag nagkaka-problema,” wika ng dating UAAP champion.