ni Korina Sanchez - @Isyung 'K' | October 5, 2022
Hindi kapanipaniwala. Ito ang bukambibig ng lahat nang malamang 433 ang tumama ng jackpot sa Grand Lotto 6/55 ng Philippine Charity Sweepstakes Office (PCSO) noong Sabado.
Hindi natin maisip ang naramdamang saya nang makita ang lumabas na kombinasyon. Milyunaryo na, tapos malalamang may kahati palang mahigit 400 katao? Natural na ang unang iisipin ng tao ay kung paano mangyayari ang ganyan—433 ang tumama, talaga ba? Pero agad namang dumipensa ang PCSO at ang paliwanag ay sadyang maraming nag-aalaga ng kombinasyon. Nataon lang na marami ang nakahula ng winning combination. Kumbinsido ba kayo?
Ayon naman sa mga mathematician, ang pagkakataong manalo sa Lotto 6/55 ay isa sa 28,989,675 dahil ganyan karami ang kombinasyong maaaring lumabas sa nasabing lotto. Kung gagawin nating porsyento, may 0.0000034% kang manalo. Sabi nga, mas mataas pa ang pagkakataong tamaan ka ng kidlat kaysa manalo sa lotto. Pero may nanalo nga, walang argumento. Ngayon, para manalo ang 433? 433 ang sabay-sabay na tinamaan ng kidlat? Tataas talaga kilay mo. Mukhang hindi na 'yan masasagot ng mga mathematician. Mukhang “only in the Philippines” na lang 'yan.
Sa totoo lang, madalas may nananalo ng lotto sa bansa. Nakita natin kung gaano kahirap tumama ng lotto batay sa mga numerong nakita natin. Pero ang dalas nga may tumatama. Sa mga lotto sa ibang bansa ay buwan, minsa'y taon pa ang inaabot bago may nananalo. Bakit kaya? May nagsasabi pa nga na tuwing may halalan, marami ang tumatama. Sa pagsulat nito ay dalawa naman ang tumama sa 6/45. Huling tinamaan ang 6/45 noong Setyembre 23. Sampung araw lang ay may tumama na naman, dalawa pa. Napakasuwerte naman ng Pilipino.
Baka ito ang mga tanong nais masagot sa planong imbestigasyon ng ilang senador sa nakaraang Grand Lotto 6/55. Para walang mag-isip o magsuspetsya na may iregularidad na nagaganap sa PCSO, partikular sa lotto. Pinalalabas naman sa TV ang mga bola. Ipinapakita na pare-pareho ang timbang ng mga bola. Hindi rin tao ang namimili ng mga bola kundi makina sa pamamagitan ng hangin, kaya baka nataon lang talaga. Talaga ba?