NBA Rookie Drafts, tutok sa Nets, Spurs at Suns

ni Anthony E. Servinio @Sports | June 20, 2023

Aabangan ng susunod na henerasyon ng mga superstar ng NBA sa pagdaos ng 2023 NBA Rookie Draft ngayong Biyernes (petsa sa Pilipinas) mula sa Barclays Center ang tahanan ng Brooklyn Nets. Nakatutok ang pansin sa 7’3” at 19 anyos na sentro na si Victor Wembanyama ng Pransiya na malakas ang posibilidad na kunin na numero uno ng San Antonio Spurs subalit hindi pa ito katiyakan.

Kung magbabago ng isip ang Spurs, nandiyan sina point guard Scoot Henderson ng G League Ignite o forward Brandon Miller ng University of Alabama. Tiyak na agad kukunin ng pangalawang pipili Charlotte Hornets at pangatlo Portland Trail Blazers ang hindi kukunin ng San Antonio sa nabanggit na tatlo.

Ito ang ikatlong beses na pipili ng numero uno ang Spurs matapos ang 1987 para kay David Robinson at 1997 para kay Tim Duncan na parehong nasa Naismith Basketball Hall of Fame. Ang dalawang higante ay naging magkakampi sa unang dalawang kampeonato ng prangkisa noong 1999 at 2003 at dumagdag pa si Duncan ng tatlo noong 2005, 2007 at 2013 matapos mag-retiro si Robinson kasunod ng pangalawang kampeonato.

Kahit nakalista bilang sentro, kaya ni Wembanyama na kumilos parang guwardiya at forward. Siya marahil ang kailangan ng Spurs matapos magtala ng kartadang 22-60 at hindi napabilang sa playoffs sa ika-apat na sunod na taon.

Malaki din ang posibilidad na mapanood si Wembanyama sa 2023 FIBA World Cup subalit kailangan muna makalusot ang mga Pranses sa group stage nila na gaganapin sa Indonesia bago tumuloy ng Pilipinas para sa playoffs. Dating kasapi siya ng Under-16 at Under-19 at inakyat sa Seniors noong nakaraang Nobyembre para sa World Cup Qualifiers.

Samantala, may parating na malaking palitan ng manlalaro at kukunin ng Phoenix Suns si Bradley Beal mula Washington Wizards para kay Chris Paul at Landry Shamet. Maaaring hindi pa tapos ang transaksyon at hindi tatagal si CP3 sa Wizards dahil nais niyang mag-kampeon bago mag-retiro.