Nawawalang titulo ng lupa

ni Atty. Persida Rueda-Acosta - @Magtanong Kay Attorney | August 12, 2021

Dear Chief Acosta,

Bumili ako ng lupa noong 2012, subalit hindi ko naipalipat sa aking pangalan ang titulo. Nasunog ang aming bahay at kasama sa mga nawala ay ang kopya ng titulo at pawang Deed of Sale lamang ang aking naisalba. Ngayon ay hindi ko na makita ang binilhan ko ng lupa. May paraan ba para muli akong makakuha ng kopya ng titulo? – Lani

Dear Lani,

Para sa inyong kaalaman, maaari kayong maghain ng petisyon upang muling mabigyan ng owner’s duplicate of title. Ayon sa Property Registration Decree (P.D. 1529):

“Section 109. Notice and replacement of lost duplicate certificate. In case of loss or theft of an owner's duplicate certificate of title, due notice under oath shall be sent by the owner or by someone in his behalf to the Register of Deeds of the province or city where the land lies as soon as the loss or theft is discovered. If a duplicate certificate is lost or destroyed, or cannot be produced by a person applying for the entry of a new certificate to him or for the registration of any instrument, a sworn statement of the fact of such loss or destruction may be filed by the registered owner or other person in interest and registered.

Upon the petition of the registered owner or other person in interest, the court may, after notice and due hearing, direct the issuance of a new duplicate certificate, which shall contain a memorandum of the fact that it is issued in place of the lost duplicate certificate, but shall in all respects be entitled to like faith and credit as the original duplicate, and shall thereafter be regarded as such for all purposes of this decree.”

Sa inyong sitwasyon, kayo ay person-in-interest dahil nabili ninyo ang lupa at may sapat na katibayan kayo sa nangyaring pagbili. Magsusumite lamang kayo ng sworn statement sa Register of Deeds tungkol sa pagkawala ng owner’s duplicate copy ng titulo ng nabili ninyong lupain. Kinakailangan ninyo rin maghain ng petisyon sa korte upang dinggin ang inyong kahilingan na magkaroon ng panibagong owner’s duplicate certificate.

Sana ay nabigyan namin ng linaw ang inyong katanungan. Ang payong aming ibinigay ay base lamang sa impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.