Nauuso na naman ang rigodon sa lider at kandidato, hays!

ni Ka Ambo - @Bistado | October 22, 2021

MATIRA matibay talaga ang eleksiyon.

Maaga pa pero nagririgodon na kaliwa’t kanan ang mga lider at kandidato!

◘◘◘

MAY lumilipat, may sinisibak, may tuma-tumbling-tumbling at bumabalimbing.

Parang komedya at zarzuela!

◘◘◘

MASYADONG at home, kaya’t maraming artista ang pumapasok sa pulitika.

Para rin kasing pelikula, may bida at kontrabida!

◘◘◘

UMIEKSENA na naman ang kampo ng artistang si Mayor Isko at maging ang grupo ng artistahing si Sen. Manny Pacquiao.

May giyera-patani sa loob ng kanilang inner circle.

Ibinabala na natin ang senaryong ‘yan kamakailan!

◘◘◘

MAY ulat namang sinipa mula sa NPC ang dating Comelec commissioner na si Goyo Larazabal.

Bakit kaya?

May nagoyo ba?

◘◘◘

AYON sa ating source ay wala na sa NPC ang former commissioner.

May ugong na may ginawang diskarte si Goyo na inilihim sa matataas na opisyal ng partido!

◘◘◘

TOTOO kayang sumakabilang bakod na si Goyo?

Ang problema, tumalon siya sa isang grupo na sinasabing may ilang miyembro na kadududa ang character dahil idinadawit sa narcolist ni P-Digong!

◘◘◘

NABABAHALA ang ilan na baka desperado na si Goyo kaya hindi siya makapili ng mas matitinong kasama.

Nanghihinayang tayo dahil maganda ang reputasyong naitindig niya sa Comelec!

◘◘◘

MAY nagsasabing nakikipag-alyado si Larazabal sa grupo ng mga Codilla.

Ipinaaalala ng ilan na baka madamay pa siya sa samu’t saring alingasngas sa DPWH dahil sa mga sub-standard projects!

◘◘◘

MAHIRAP talagang makabuo ng solidong grupo na may maayos at kapita-pitagang core group.

Ang epektibong core group kasi ang pundasyon ng matatag na maniobrang pampulitika!