Nakamamatay ang COVID-19, lalo na ang Delta variant!

ni Fr. Robert Reyes - @Kapaayapaan| July 24, 2021

Nagtataka tayo sa kakaibang reaksiyon ng pamahalaan at publiko sa ganitong babala. Samantalang malinaw ang nakababahalang ulat tungkol sa pagtaas ng mga kaso ng COVID-19 sa Indonesia; Vietnam, Thailand at Malaysia, tila hindi ganun ang pagkabahala at pag-aalala at ang karampatang pag-iingat ng ating bansa.

Kitang-kita ang pagpupumilit na bumalik sa dating gawi o “dating normal” (the old normal) ng marami. Kitang-kita ito sa nagdagsaang sasakan sa kalye na dahilan din ng patuloy na pagtaas ng presyo ng krudo at gasolina. Oo, muling dumarami ang nagbubukas ng mga hanapbuhay na siyang dahilan ng pagdagsa ng mga tao sa kalye.

Okay lang ba, wala na bang problema? Nararapat ba talagang bumalik tayong lahat sa dati o lumang normal? Sino ba talaga ang nagtutulak na bumalik sa dati o lumang normal — gobyerno o merong puwersang tumutulak upang bilisan ang pagbalik lumang normal?

Nagtanong tayo sa mga dalubhasang pinag-aaralan ang pagtaas (surge) at pagbaba (weakening) ng pagkalat ng COVID-19. Tumataas ba ang mga kaso ng COVID-19?

Samantala, noong Huwebes, binuo sa aming parokya ang Parish Ministry of Health Education and Promotion sa pamumuno ng ilang “medical workers”, tila mahirap hintayin at asahan ang pamahalaang magsabing kailangan ang lubos na pag-iingat kaya’t dapat lang ipagpatuloy ang pag-iingat (pagsuot ng facemask at face shield; paghuhugas ng mga kamay; physical distancing at ang pag-iwas sa mataaong lugar at hindi kinakailangang pagtitipon.

Kung hindi ibabalik ng pamahalaan ang ECQ at pananatiliin ang kasalukuyang GCQ na mas maraming pagluluwag kaysa sa paghihigpit kung kaya’t inaakala ng marami na halos wala nang panganib na mahawa ng pandemya; hayaan na lang kumilos at magsalita ang ilang mga nagsasaliksik, nagmamalasakit na mamamayan na ikalat ang “mahalagang balita ng lubos na pag-iingat at pagbabago, pagpapa-simple ng buhay sa harap ng pandemya.”

Marahil isa ring dahilan kung bakit ganu’n na lang ang pagwawalambahala ng marami sa COVID-19 ay ang mistulang kaligtasan ng mga hindi pa nahahawa at nawawalan ng mahal sa buhay dahil sa inpeksyon dulot ng COVID-19.

Maghihintay pa ba tayong mahawa at mamatayan ng mahal sa buhay bago tayo tuluyan nang magising? Nakamamatay ang COVID-19, lalo na ang COVID-19 Delta variant!