Nag-YouTube, milyun-milyon ang followers…

IVANA, TODO-IYAK NANG LAITIN NG MGA BFF NA 'DI SISIKAT BILANG BOLD STAR

ni Erlinda Rapadas - @Teka Nga! | February 12, 2021

Inamin ni Ivana Alawi na sobra siyang dismayado sa ilang itinuring niyang kaibigan noong nagsisimula pa lamang siyang pumasok sa showbiz.

Sa halip daw na damayan siya at bigyan ng moral support, sila pa ang unang nanghamak sa kanya.

Iniyakan ni Ivana ang sinabi ng mga kaibigan na wala siyang mararating sa kanyang paghuhubad. Masamang-masama ang loob niya noon. Pero sa halip na sumuko at panghinaan ng loob, ginawa ni Ivana ang lahat upang patunayan sa mga taong umapi sa kanya na may puwang siya sa showbiz.

At hindi niya pinagsisihan ang ginawa niyang tulay upang sumikat — ang pagpapa-sexy sa mga vlogs niya sa YouTube.

Para kay Ivana, hindi naman cheap at bastusin ang kanyang mga larawan. Marami ngang positive comments siyang natanggap. Bigla siyang sumikat sa social media at dumami ang subscribers sa YouTube na milyun-milyon na ngayon.

Dahil din sa kanyang sexy image kaya napili si Ivana bilang Calendar Girl ng Tanduay. At dahil sa magagandang blessings na dumating sa kanyang buhay, nagawa nang patawarin ni Ivana ang mga taong umapi noon sa kanya.