ni Nitz Miralles - @Bida | October 3, 2022
Ang pagiging nominated ng On the Job sa International Emmy Awards 2022 pa lang ang naipo-post ni Dennis Trillo sa Instagram account niya. Kasama kasi siya sa cast ng On the Job: The Missing 8 kaya very proud ito sa inabot ng pelikula na ipinalabas na series sa HBO Max.
Hindi pa naipo-post ni Dennis na ang On the Job: The Missing 8 ay official entry ng Pilipinas sa 2023 Oscars sa Best Foreign Language Award category. In-announce ang good news na ito ng Film Development Council of the Philippines (FDCP) at Directors Guild of the Philippines, Inc. (DGPI) sa closing ceremony ng 2022 Philippine Film Industry Month last Friday.
Nangako si FDCP Chair Tirso Cruz III na magbibigay ng P1 million sa producer ng movie na Reality Entertainment para makatulong sa campaign nito for an Oscar nomination. Let’s all hope for the best!
Samantala, mababasa sa IG ni Dennis ang comment ng asawang si Jennylyn Mercado na “Congratulations, Love” para sa world premiere ng Maria Clara at Ibarra sa GMA-7.
“Thank you, Mahal ko,” ang sagot ni Dennis.
Kakaibang role na naman ang ginagampanan ni Dennis sa historical portal fantasy bilang si Crisostomo Ibarra at Simoun. Malaking challenge ito kay Dennis and another big project at malaking preparasyon din ang kanyang ginawa.
“Hindi pangkaraniwang role ang role ni Crisostomo Ibarra at dapat, alam mo ang story ng Noli Me Tangere at El Filibusterismo. Kailangan ding basahing maigi at intindihing mabuti ang script. Nagkaroon din ako ng konting Spanish lesson. Hindi ka puwedeng magkamali, dapat tama ang salita, kilos at arte. Kailangang tama lahat at hindi ka dapat magkamali para authentic,” sabi ni Dennis.
Kung pinuri ni Barbie Forteza si Dennis, pinuri rin ni Dennis si Barbie. “Masayang experience to work with Barbie. Dito makikita na magaling siyang aktres. Ang galawan niya, parang beteranang aktres,” sabi ni Dennis na ikinatuwa ni Barbie.
Ang Maria Clara at Ibarra ay mula sa direction ni Zig Dulay. Aliw ang mga eksena nina Klay (Barbie) at Crisostomo (Dennis).