Michael V., nagpositibo uli sa test sa COVID-19

ni Lolet Abania | July 23, 2022

Nagpositibo ulit sa test sa COVID-19 si Michael V. sa ikalawang pagkakataon.

Nag-share ang Kapuso actor ng update ng kanyang kondisyon ngayong Sabado.

“Nakatanggap ako ng notification from my old friend, COVID,” post niya sa Instagram.

“Matagal na kaming hindi nagkikita. Actually, sinabihan ko na s’ya na ’wag nang bumalik pero eto na naman s’ya… magha-‘HI’ lang daw at magpapaalala na nandito lang s’ya sa tabi-tabi. Hindi naman daw talaga s’ya umalis, palipat-lipat lang s’ya ng bahay,” ani Michael V.

Ayon kay Bitoy, tawag din kay Michael V., ang COVID-19 ay muling nakaapekto sa kanyang trabaho, pamilya, at komunidad. “Pati asawa ko dinamay pa!” sabi niya.

“Pero hindi ko naman s’ya masisi! Kasi hindi rin naman s’ya nagkulang ng paalala.

Talagang matitigas lang ang ulo ng mga tao minsan,” dagdag ni Bitoy.

“Kaya COVID, eto ang message ko sa ’yo: Hindi ka pa rin welcome sa bahay. Pero salamat na rin sa dalaw. Hayaan mo… kahit bad trip ako sa ’yo, hinding-hindi kita makakalimutan.”

Unang nagpositibo sa test sa COVID-19 si Bitoy noong 2020. Nai-share niya noon sa isang vlog na nakaranas siya ng flu-like symptoms at nawalan din ng pang-amoy at panlasa.