Miado, nanggulpi sa ONE, Olsim, nabigo kay Phogat

ni Gerard Arce - @Sports | October 31, 2021

Pinaghandaan nang todo ni Pinoy Jeremy “The Jaguar” Miado ang laban nang gamitin niya nang epektibo ang reach advantage at taas niya para sa rematch kay Chinese fighter Li Tao Miao habang hindi naman pinalad sa women’s Atomweight Grand Prix semi-finals si Team Lakays Jenelyn Olsim nang madaig ni wrestler Ritu “The Indian Tigress” Phogat noong Biyernes ng gabi sa ONE: NextGen sa Singapore Indoor Stadium.

Solidong mga sunud-sunod na upak ang pinadapo ni Miado kay Li Tao upang mapilitan si referee Justin Brown na paghiwalayin ang dalawa sa 2nd round at inireklamo pa ng Chinese fighter ang isang left hook sa mukha niya pero nakitang lehitimo ang pinadapo ng Pinoy.

Tuluyan nang tinapos ni Miado ng mga upak sa ulo at katawan ang Tsino sa bisa ng TKO na una rin silang nagbangga noong Nobyembre 2019 sa ONE: Age of Dragons na ipinanalo rin niya sa isang flying knee para sa 1st round victory.

“I’m very surprised because I expect that he’s gonna shoot (for takedown), but he chose to throw (trade) punch with me,” wika ng Thailand-based Pinoy fighter makaraan ang laban.

“First of all, I would like to thank God for this victory and to all my coaches who helped me in this training camp who made a lot for my game plan also to Marrock Force.”

Nabigo naman ang 24-anyos na 2019 Southeast Asian Games medalist na si Team Lakay stalwart Olsim laban sa 2016 Commonwealth Games freestyle wrestling Indian champion para sa unanimous decision at makasampa na sa final round ng Atomweight GP at makakaharap si dating Muay at Kickboxing titlist Stamp Fairtex na dinaig sa unanimous decision si Brazilian Julie Mazerbaba sa sarili nilang semis-bout. “This is an important bout for me. I wanted to give my 100% in this fight. I wanted to give my country the first woman World champion. That’s why this is very important for me,” ayon kay Phogat makaraan ang laban.