Mga magulang, out! CALOY AT MGA UTOL, BAKASYON GRANDE SA AUSTRALIA

ni Mercy Lejarde @Talkies | June 29, 2026

Photo: Carlos Edriel Yulo - Instagram

Bonggang pasasalamat ang ibinahagi ng two-time Olympic gold medalist na si Carlos Yulo sa kanyang girlfriend na si Chloe San Jose matapos matupad ang kauna-unahan nilang international trip na kasama ang kanyang tatlong kapatid na sina Joriel, Karl Jahrel Eldrew, at Elaiza Andriel.

Sa social media post ni Carlos, ibinahagi niya ang ilang larawan nila habang nagbabakasyon sa Melbourne, Australia. Kapansin-pansin na hindi kasama sa biyahe ang kanilang mga magulang.

Ani Carlos, “Our first international travel together: all 4/4 siblings in one trip, there’s always a FIRST TIME!

“Salamat, mahal, Chloe, lalong-lalo na po kay LORD for making this happen.”

In fairness, umani ng positibong reaksiyon mula sa mga netizens ang social media post ni Carlos Yulo tungkol sa kanilang bonggang bakasyon sa Melbourne, Australia.

‘Yun lang, and I thank you.

---

Sa isang social media post, ibinahagi ng actress-producer na si Daisy Romualdez ang larawan nila kasama ang mahusay na OPM icon na si Jed Madela habang isinasagawa nila ang rehearsal para sa kanilang nalalapit na show na Moonlight Serenade: A Night of Timeless Music & Elegance, na gaganapin sa The Tent, The Manila Hotel sa June 30, 2026.

Isang oras bago ang kanyang social media post, tumawag si Daisy sa amin upang ipabatid na hindi nakadalo si singer-actress Geneva Cruz sa rehearsal ng nasabing show na ginanap noong June 27, 2026.

Ayon kay Daisy, hindi nakadalo si Geneva dahil mayroon itong ibang show na kailangang gampanan. Gayunpaman, nilinaw ng actress-producer na wala siyang sama ng loob sa singer-actress.

Dagdag pa ni Daisy, matapos nilang pag-usapan ng direktor ng show ang sitwasyon, napagdesisyunan nilang huwag na munang isama si Geneva sa palabas..

Samantala, ang Moonlight Serenade: A Night of Timeless Music & Elegance ay isang magical dinner concert na magtatampok ng gabi ng musika, elegance, at world-class performances. 

Tampok sa nasabing concert ang OPM icons na sina Jed Madela at Mark Bautista.

Gayunpaman, hindi pa rin isinasantabi ang posibilidad na maging surprise guest si Geneva sa nasabing palabas. Kaya abangan na lamang natin ang kanilang performance.

Well, kampante pa rin ang inyong lingkod na mae-enjoy ng mga manonood ang isang gabing puno ng musika dahil sa husay, talento, at karisma nina Mark Bautista at Jed Madela.

---

MATAGUMPAY na nagtapos sa Program for Leadership Development (PLD) ng Harvard Business School noong Hunyo 2026 ang aktor-negosyante na si Matteo Guidicelli matapos makumpleto ang masinsinang anim na buwang programa.

Sa kanyang social media post, ibinahagi ni Matteo ang kanyang tagumpay at inialay ito sa kanyang pamilya, lalo na sa kanyang asawang si Sarah Geronimo, na aniya’y naging pangunahing inspirasyon at katuwang niya sa pag-abot ng kanyang mga pangarap.

Saad ni Matteo, “Mission accomplished but the mission ALWAYS continues.

“Six months of case studies, sleepless nights, and focus. When Professor Margolis asked what’s one thing we would like to leave behind to our PLD cohorts, this is what I wrote:

“‘Let us hold the ground with our morals and values for family and country. Let’s continue to win the hearts and minds of the people around us. Continue to scaffold up and stretch to create a difference and value to the world.

“To my family, and to my wife — thank you for all the support. This one’s because of you.

“Gianmatteo Vittorio Fernan Guidicelli, HBS PLD (Harvard Business School - Program for Leadership Development).”

Isang malaking congratulations, Matteo! Boom, patok ka d’yan!