MAYOR ZAMORA, WISH NA BALIKAN NI SUNSHINE SI MACKY

ni Nitz Miralles - @Bida | October 14, 2022

Hindi rin binati ni Sunshine Cruz si San Juan Councilor Macky Mathay sa birthday nito noong October 11 at para sa mga Marites, kumpirmasyon ito na hiwalay na talaga ang dalawa.

Pero ang anak ni Sunshine na si Sam Cruz, binati si Macky sa Instagram nito at kahit “Happy birthday Tito Macky” lang ang sinabi, marami ang nalungkot.

Lalo na nang sumagot si Macky ng “@samcruz Thank you, Sammy. I miss you and I love you.”

Matatandaang present pa si Macky sa debut ni Sam at sa party nito sila nagkita at nagkamayan ni Cesar Montano.

Pati si San Juan City Mayor Francis Zamora, bumati rin kay Macky at may meaning ang birthday greetings nito na: “Ang wish ko para sa 'yo ay 'Sana, bumalik muli ang sikat ng araw sa buhay mo.'"

Ang pangalan ni Sunshine sa Tagalog ay sikat ng araw, kaya malamang, siya ang tinutukoy ni Mayor Zamora na bumalik sa buhay ni Macky.

Kailangan sigurong mag-double effort si Macky to win Sunshine’s heart dahil kumanta na ito ng Someone That I Used To Love. Meaning, past tense na, at sinundan ng quotation card post na “Some People Are Only Meant To Stay In Your Heart Not In Your Life.”

Ang maganda lang, parehong busy ang mag-ex, no time silang magmukmok.

Si Macky, busy sa trabaho bilang konsehal at si Sunshine, nagte-taping ng Underage ng GMA-7 na malapit na ang airing.