May incentive sa gobyerno ang business na eco-friendly

ni Atty. Persida Rueda-Acosta - @Magtanong Kay Attorney | January 03, 2022

Dear Chief Acosta,

Mayroon bang insentibo ang pamahalaan para sa mga negosyong tumutulong sa pangangalaga ng kalikasan? – Marko

Dear Marko,

Para sa inyong kaalaman, ang inyong katanungan ay binigyang-linaw ng Section 5 ng Republic Act (R.A.) No. 10771 o kinikilala bilang “Philippine Green Jobs Act of 2016”.

Nakasaad sa Section 5 ng R. A. No. 10771 ang sumusunod:

“SEC. 5. Incentives. – For the purpose of encouraging business enterprises to generate and sustain green jobs as certified by the Climate Change Commission, as provided in Section 6(o) hereof, business enterprises shall enjoy the following incentives:

(a) Special deduction from the taxable income equivalent to fifty percent (50%) of the total expenses for skills training and research development expenses which is over and above the allowable ordinary and necessary business deductions for said expenses under the National Internal Revenue Code of 1997, as amended; and

(b) Tax and duty free importation of capital equipment: Provided, That the capital equipment is actually, directly and exclusively used in the promotion of green jobs of the business enterprise.”

Ayon sa probisyon ng nasabing batas, ang negosyo na nagbibigay ng green jobs na sertipikado ng Climate Change Commission o mga trabahong tumutulong sa pagpapanatili o pagpapanumbalik ng kalidad ng kalikasan ay magtatamasa ng mga sumusunod na insentibo:

Special deduction mula sa taxable income katumbas ng 50% ng kabuuang gastos buhat sa pagsasanay sa kakayahan ng mga empleyado at research development. Ang nasabing special deduction ay bukod pa sa itinilagang ordinary at necessary business deductions para sa mga nasabing gastusin, sa ilalim ng National Internal Revenue Code of 1997, as amended.

b. Tax at duty free na pag-angkat ng mga kagamitan na direkta at ekslusibong ginagamit sa operasyon ng negosyo.

Sana ay nabigyan namin ng linaw ang inyong katanungan. Ang payong aming ibinigay ay base lamang sa impormasyon na inyong inilahad at maaaring magbago kung mababawasan o madaragdagan ang mga detalye ng inyong salaysay.

Maraming salamat sa inyong patuloy na pagtitiwala.