May bayad na ang pagdaan sa Skyway 3

ni Ka Ambo - @Bistado | July 08, 2021

Maniningil na ng toll fee sa Skyway 3.

Lalong mababawasan ang daraan dito!

◘◘◘

WALA pa raw local transmission ng Delta variant ng COVID mula India sa Metro Manila.

‘Yan ay batas sa datos!

◘◘◘

HINIHINTAY ang panibagong 12-milyon doses ng COVID vaccine ngayong Hulyo.

Huwag sanang masikwat!

◘◘◘

POPULAR na si Sen. Manny Pacquiao pero lalo siyang naging popular nang patulan ni P-Digong.

Kumagat siya sa gimik!

◘◘◘

SIMPLE lang ang dapat gawin ni Pacquiao.

Sagutin lang niya nang maayos ang mga patutsada at makokorner niya ang simpatiya ng mga Pinoy!

◘◘◘

EMOSYON ang batayan ng pagboto.

At ‘yan ay pumapabor kay Pacquiao higit sa sinumang aspirante!

◘◘◘

ANG pagkakaiba nina Heneral Bato at Lito Lapid?

Pareho lang, ‘di ba?

Dating hepe ng PNP at isang high school undergrad—pero hindi nagkalalayo sa performance!

◘◘◘

AMINADO si Lapid na hindi siya nakatuntong ng kolehiyo, pero palagi siyang panalo at naging gobernador pa.

Ganyan din si Ramon Magsaysay ng Zambales!

◘◘◘

HINDI isyu ang pinag-aralan pagdating ng eleksiyon sapagkat ang mga botante ay bumuboto batay sa emosyon.

Alam ‘yan ng mga eksperto.

‘Yan mismo ay protektado ng Konstitusyon!

◘◘◘

KUNG idaraan sa isip ang pagboto sa pagka-pangulo, aba’y tiyak na walang mauupo sa Malacañang.

Awtomatikong ginagamit ang isip ng tao, pero kapag kumilos o gumalaw — tulad ng pagboto, emosyon na ang nagtutulak dito!

◘◘◘

ANG taong walang emosyon ay robot.

Emosyon ang tunay na nagpapagalaw ng mundo at hindi ang isip!

◘◘◘

ANG mga pulitiko ay likas na plastic.

Mahihina naman ang utak ng mga political analyst.

Luma na ang mga aklat na kanilang ginagamit—robot ang mga ‘yan at bookish!

◘◘◘

TEKA, bakit ba nagwagi si P-Digong, sige sagutin ninyo?

Tama, emosyon ng tao ang nagluklok sa kanya!

◘◘◘

PAANO naupo sa Malacañang sina Tita Cory at ex-P-Noy kung totoo na ang isip ang ginagamit sa pagboto?

Alam nating lahat na 100 percent emosyon ang umiiral sa panahon ng halalan!