May 4 na serye ang ika-7 taon ng Takbo Para Sa Kalikasan

ni Anthony Servinio @Sports | March 14, 2024

Magbabalik ang isa sa pinaka-minamahal na serye ng takbuhan sa bansa, ang Takbo Para Sa Kalikasan, para sa kanilang ika-7 taon mula pa noong 2018. Gaya ng kinagawian, magkakaroon ng apat na yugto na hahamon sa kakayahan ng mga kalahok kasabay ang pagpapalaganap ng pag-aalaga sa Inang Kalikasan. 

Bubuksan ang serye sa Fire Run sa Mayo 5 sa Liwasang Ambahan ng Cultural Center of the Philippines Complex simula 3 a.m.  Tampok dito ang 16 km at iba pang karera sa 10, 5 at 1 km. Bahagi ng malilikom na pondo ay mapupunta sa Climate Foundation, isang samahan na ang layunin ay labanan ang pagbabago ng klima.  Mula pa noong 2007, ilan sa kanilang mga proyekto ay may kinalaman sa pangangalaga sa karagatan at paglilinis ng hangin. 

Lahat ng mga magtatapos ay sasabitan ng medalya at tatanggap ng t-shirt at regalo galing sa mga sponsor. Ito ay dagdag sa numero at damit na makukuha oras na magrehistro. Kasalukuyang ginaganap ang pagpapalista online sa My Run Time at sa Facebook ng Takbo Para Sa Kalikasan.  Tumatanggap din ng kalahok sa piling mga sangay ng Chris Sports. 

Mayroon ding Virtual Run para sa mga hindi makakapunta ng CCP.  Tumakbo lang sa Mayo 4 at 5 at ipadala ang katibayan ng distansiya at oras upang matanggap ang parehong medalya at mga t-shirt.  Pagkatapos ng Fire Run ay susunod ang Water Run (Hulyo 14), Air Run (Setyembre 22) at Earth Run (Nobyembre 17).  Ang mga makakabuo ng apat na yugto ay makakakuha ng sabitan para sa apat na medalya. 

Samantala, abangan ang iba pang mga parating na alay ng Green Media Events.  Gaganapin ang NASTA-TESDA Tek-Bok Run sa Abril 13 at susundan agad ng APO Half Marathon: Race To Rescue sa Abril 14, pareho sa CCP Complex.