Matagal 'di lumabas sa TV at movies… TIKET SA CONCERT NI SARAH, SINGMAHAL NG KAY HARRY STYLES

ni Erlinda Rapadas @Teka Nga | March 20, 2023

Bagama’t walang regular na TV show at pelikulang pinagkakaabalahan ngayon ang Pop Princess na si Sarah Geronimo, may inihanda namang malaking concert ang Viva Entertainment para sa kanyang 20th anniversary sa showbiz.

Gaganapin ang nasabing anniversary concert sa Araneta Coliseum ngayong May 12, 2023 at open na sa publiko ang tickets.

May mga celebrities na rin ang naka-line-up o magiging bahagi ng anniversary concert ng Pop Singer, ngunit wala pang inilalabas na detalye tungkol sa mga inihahandang performance.

Balita ring medyo may kamahalan ang concert ticket ni Sarah na kasingmahal daw ng ticket sa katatapos na concert ni Harry Styles.

Gayunpaman, all-out support ang mga loyal Sarah G. Popsters at ngayon pa lang ay bumibili na sila ng ticket sa concert ng kanilang idolo.

Pero ang inaabangan ng lahat ay kung darating at manonood ba ng concert ang mga magulang ni Sarah G. na sina Mommy Divine at Daddy Delfin.