MANILYN, TUTOL SA SINABI NI LIZA NA SUMISIKAT LANG ANG ARTISTA DAHIL SA LOVE TEAM

ni Vinia Vivar @Frankly Speaking | May 21, 2023

Hindi sang-ayon si Manilyn Reynes sa naging pahayag ni Liza Soberano na hindi sisikat ang isang artista sa showbiz industry kung walang ka-love team.

Matatandaang sinabi ito ni Liza kamakailan sa isang panayam na naging kontrobersiyal dahil marami nga rin ang kumontra.

Sa panayam kay Manilyn ni Boy Abunda sa Fast Talk with Boy Abunda, tahasang sinabi ng aktres na hindi siya agree sa sinabi ni Liza.

“Disagree. Certainly, kaya mong gawin ‘yan on your own,” sey ni Mane na matatandaang dati ring naging parte ng love team noong kabataan niya.

“Hindi ko sinasabi na hindi mo kailangan ng ka-love team. Somewhere, sometimes, somehow, kailangan meron ka ring ka-love team lalo na kapag growing up,” sabi ni Manilyn.

“Pero of course, you can do it on your own. Ipakita mo what you have got,” dagdag niya.

“Kasi sa totoo lang, ang hirap ng half-baked na ginawa mo. Tingnan mo kapag napansin mo rin, kapag napanood mo, ‘Ay, parang dapat, meron pa akong ibinigay,’” sambit pa niya.

Aminado naman ang veteran actress na hindi madali ang pag-aartista dahil matinding disiplina at seryosong training ang kailangang pagdaanan. Kahit nga raw matagal na siya sa industriya, every day ay may natututunan pa rin siya.

“Every day, natututo pa rin po ako. Sa 40 years sa industriyang ito, ayoko pong tumigil na matuto kasi 'pag nag-stop na tayo, wala na, ano pa ang mangyayari? I still listen, I still ask,” aniya.