Manabat, parte pa rin ng Chargers para sa 2023 PVL

ni Gerard Arce @Sports | January 16, 2023

Matinding pasabog ang inilabas ni Aleona Denise “Dindin” Santiago-Manabat nang ianunsiyo ang pagpasok sa Akari Power Chargers matapos opisyal na maging parte ng koponan upang mas palakasin ang opensibang pantapat sa mga katunggali sa darating na 2023 season ng Premier Volleyball League (PVL) Open Conference simula Pebrero.

Mas piniling manatili sa Pilipinas ng 6-foot-2 na wing spiker at middle blocker upang samahan ang batang koponan na handang ipamalas ang malulupit na hambalos at malawak na karanasan matapos pormal na ipakilala ng Akari bilang bagong pambato sa pambungad na komperensiya. “Leadership. Intensity. And top-notch skills. All of these we can expect from the newest member of the Akari fam! Let's welcome Dindin Santiago-Manabat into the fold! LET'S GO! #AkariRising,” pahayag ng club sa kanilang social media post.

Naging maningning ang karera ni Santiago-Manabat mula sa local at international league ng makailang beses itong hiranging best attacker at best middle blocker sa University Athletic Association of the Philippines (UAAP), Shakey’s V-League, Philippine Super Liga at sa PNVF Champions League for Women.

Samantala, ikinalugod naman nina Samahang Basketbol ng Pilipinas President Al Panlilio, Chairman Emeritus Manny V. Pangilinan ang naturalization ni Justin Brownlee dahil sakto ito sa sixth window ng FIBA World Cup Asian Qualifiers sa Pebrero. Kasabay nito pinasalamatan ng SBP ang Pangulong sa paglagda sa batas ng Republic Act 11739 na nagpapahintulot na maging ganap na Pinoy si Brownlee. "We also are grateful to the Senate, through Sen. Francis Tolentino, chairman of the Committee on Justice and Human Rights, and the House of Representatives, through Rep. Juliet Marie de Leon Ferrer, chairman of the Committee on Justice, for their invaluable support in passing the legislative act."