ni Rohn Romulo - @Run Wild | September 7, 2022
Ang laki na pala ng kinita ng controversial historical family movie of the year na Maid In Malacañang ng Viva Films mula sa direksiyon ni Darryl Yap na pinagbibidahan nina Cesar Montano, Ruffa Gutierrez, Ella Cruz, Diego Loyzaga at Cristine Reyes at nasa ika-fifth week na sa mga sinehan.
Sa Facebook post ni Direk Darryl, dahil kumita na ito ng higit sa P650 million (total global gross and counting), nakuha na nila ang 3rd Highest-Grossing Filipino Movie of All Time.
Hindi pa rin natitinag sa unang puwesto ang Hello, Love Goodbye (2019) nina Alden Richards at Kathryn Bernardo na humamig ng P880 million, samantalang ang The Hows of Us (2018) nina Kathryn at Daniel Padilla naman ang pumangalawa na nakapagtala ng P810 million.
Makikita sa naturang FB post ang official list ng Top 20 Highest-Grossing Films mula sa Philippine Box-Office kung saan nananatiling number one ang Hollywood movie na Avengers Endgame (2019) na kumita ng mahigit P1.7 billion, kasunod ang Avengers: Infinity Wars (2018) na naka-higit P1.2 billion naman sa box office.
Caption ng kontrobersiyal na direktor, "Sa ngayon, sa Philippine Box Office, ang #MAIDinMALACAÑANG po ay ang pangatlong (3rd) Pinakapatok na Pelikulang Pilipino; pang-walo (8th) naman kung kasama ang mga Foreign Films — at patuloy pa rin po tayong showing, umaasang baka may itataas pa.
"Ngunit ang tunay na ikinagagalak ng aking puso, kasama ng aking team ay ang record na nagawa nito para sa aking father studio.
"Maraming salamat po sa lahat ng nakapanood at patuloy na tumatangkilik sa aming munting pelikula; SALAMAT PO SA PAGBIBIGAY NG KARANGALAN SA MAID IN MALACAÑANG BILANG PINAKAPATOK NA PELIKULA NG VIVA Films SA ATING KASAYSAYAN.
"Ipinagmamalaki po namin ang lahat ng ito ay ating nakamit sa panahon ng pandemya; bitbit ang karangalang wala nang mas prestihiyoso sa suporta at pagtangkilik ng sambayanang Pilipino."
May nauna ring FB post si Direk Darryl, na ikinabuwisit ng mga bashers niya na 'yung iba, ang wild talaga ng mga naging comments...
"35 years old
13 Movies
2 Box Office Hits
11 Top Films on streaming
9 Million total social media followers
1 Billion Social media content views
0 reason to be bothered.
Sa kalaban, kayabangan.
Sa nangangarap, katuparan."
Kaya comment pa niya sa kanyang post, "Ang daming mapapait na nagko-comment, mga mukhang Kakampink na walang narating sa buhay maliban sa mga rally nila."