Magsayo itataya 5 straight kontra Cortes sa Las Vegas

by Gerard Arce @Sports News | August 15, 2026

Photo: Circulated

Itataya ni dating World Boxing Council (WBC) featherweight champion Mark “Magnifico” Magsayo ang kanyang five-fight winning streak at lumapit sa puwestuhan sa world rankings kontra unbeaten Mexican-American Andres Cortes sa 10-round lightweight showdown sa Setyembre 12 sa T-Mobile Arena sa Las Vegas, Nevada sa Amerika.

Sasailalim ang naturang tapatan sa undercard bout sa world title fight sa pagitan nina reigning World Boxing Council (WBC) welterweight champion Ryan “KingRy” Garcia at British challenger Conor “The Destroyer” Benn sa 12-round main event.

Ito ang ikalawang sabak ng 31-anyos na tubong Tagbilaran City sa Zuffa Boxing Promotions matapos na pumirma ng kontrata, kung saan naipangakong sasabak sa tatlong laban kada taon, kasunod ng matagumpay na comeback kontra dating Irish champion na si Feargal McCory sa pamamagitan ng fifth-round technical knockout sa 10-round lightweight battle nitong Abril 5 sa Meta Apex sa Las Vegas.

“I’ve waited for a night like this my whole career. I signed with Zuffa to be on the biggest shows,” pahayag ni Magsayo. “Andres Cortes called me out, and I answered. He won’t have his ‘0’ after I get done with him.”

Nagsimulang sumabak si Magsayo sa 126-pounds bago mapagwagian ang WBC title kay Gary Russell Jr. nung 2022, habang unti-unti na itong nahihirapang makuha ang timbang sa 130lbs, kung saan minsan itong naging No.1 contender, hanggang sa maudlot ang elimination bout laban kay Michael Magnesi kaya’t nagdesisyon itong umakyat sa lightweight division.

Huling beses sumabak sa world title fight si Magsayo kontra Brandon Figueroa para sa WBC interim featherweight belt, na kanyang nabitawan laban kay Rey Vargas sa split decision noong Hulyo 9, 2022 sa Alamodome, Texas.

Huling beses namang sumagupa si Cortes ngayong taon laban kay Erdison Garcia na nagtapos sa 10 round unanimous decision sa pareho ring card kasama si Magsayo sa Meta Apex.

“This is my opportunity to show the world what I can do. I’m going to destroy Mark Magsayo on September 12,” wika ni Cortes. “Growing up in the gyms in Las Vegas, I dreamed of fighting on a platform like this in front of my people. The time has come.”