Taduran hindi isinuko ang korona, IBF champion pa rin

by Gerard Arce @Sports News | November 9, 2026

Photo: Circulated

Hindi pinayagan ni reigning at defending International Boxing Federation (IBF) minimumweight champion Pedro “Kid Pedro Heneral” Taduran na mabitbit ang nalalabing korona ng Pilipinas patungong Espanya matapos magpamalas ng  kahusayan at katatagan sa ibabaw ng ring para ibigay ang unang pagkatalo ng Spanish challenger na si Brandon Moreno sa bisa ng 12-round unanimous decision   sa Kiva Auditorium sa Albuquerque, New Mexico kahapon.

Nanatiling agresibo at hindi tinantanan ng upak ng 30-anyos na Pinoy southpaw ang katunggaling Espanyol, na unang beses sumabak sa labas ng bansa para isang world title fight, upang maitala ang dalawang pagpabor ng mga hurado na sina Esther Lopez at Mark Sanchez na kapwa may 115-113 iskor at ang landslide na pagtingin ni Anthony Romero sa 120-108, tungo sa ika-7 sunod na panalo at ika-apat na world title defense.

Nagsilbing  coach sina Joven Jimenez, Jino Rodrigo, Pete Sussens at dating world champion Jerwin “Pretty Boy” Ancajas.   “It was a hard fight not gonna lie,” pahayag ni Taduran sa isang post. “He was heavy handed but my experience helped me adjust.”

Umangat ang kartada ni Taduran sa 21 wins, 4 loss at draw, habang nagwagi ng 14 na panalo mula sa knockout, upang manatiling nag-iisang Filipino champion. Natikman ni Moreno ang unang pagkatalo sa 16-1 (win-loss) rekord kasama ang 5 panalo mula sa knockouts. 

Taduran 'patayan' na sa training kontra Moreno

by Gerard Arce @Sports News | November 7, 2026

Photo: Todo na sa sparring si Pedro Kid Taduran kay Jerwin Ancajas para mapaghandaan ang laban sa Linggo kay Brandon Moreno ng Spain. (videopix)

Nakakapanibago sa paningin ang naiibang katayuan ni dating longtime super-flyweight titlist na si Jerwin “Prettyboy” Ancajas na puspos sa paggabay at tumatayong trainer ni reigning at defending International Boxing Federation (IBF) minimumweight champion Pedro “Kid Pedro Heneral” Taduran bilang preparasyon kontra sa unbeaten challenger na si Brandon Moreno ng Spain sa Linggo ng umaga (oras sa Pilipinas) sa Kiva Auditorium sa Albuquerque, New Mexico.

Sa inilabas na video ng manager at trainer ni Ancajas na si Joven Jimenez, ipinakita nito ang mitts training at movement ni Taduran sa ibabaw ng ring kasunod ng malulutong na suntok na binibitawan bilang parte ng ensayo ng 30-anyos na southpaw.

Maririnig sa video ang malulutong na upak ng tubong Libon, Albay, habang bumabanat, kaakibat ang mga taktika na maaaring gawin kay Moreno. “Patamaan mo ng kaunti, yan patulugin mo din. Bang,” pabirong hirit ni Jimenez patungkol sa mga suntok ni Taduran kay Ancajas, na tinawag rin nitong “Pretty Roach” na may pagka- coach Freddie Roach ang dating.

 “Mga game plan na lang ang pinag-uusapan at ginagawa namin dito sa ensayo. Nakapag-sparring na naman daw siya sa Pinas. Mabuti na rin ang kanyang kondisyon,” pahayag ni Joven sa mensahe sa Bulgar Sports, kasunod ng kanilang ensayo sa Knuckleheads Boxing Gym sa Las Vegas, Nevada katuwang sina Jino Rodrigo, Pete Sussens at Ancajas.

Canoy tuloy ang puksaan kontra Collazo sa Enero

by Gerard Arce @Sports News | November 6, 2026

Photo: Matutuloy na ang bakbakang Canoy-Collazo sa Enero 2027. (pinoysportsanalyst) 

Gaya ng naunang paghahanda, tuloy pa rin ang mga plano ni Filipino challenger Joey “The Baby Face” Canoy kontra kay Puerto Rican minimumweight champion Oscar ‘El Pupilo” Collazo upang ipagpatuloy ang naudlot na tapatan na itinakda sa Enero 9, 2027 sa teritoryo ng kalaban sa Puerto Rico para sa isang world title fight.

Wala na umanong atrasan ang naunang pagkaka-antala ng laban kasunod ng problema sa US visa ni Canoy na dapat nakatakda noong Hunyo 20 sa California, U.S.A. kung saan napilitang labanan ng 29-anyos na Puerto Rican si Neider Valdez para sa bakanteng World Boxing Organization (WBO) International flyweight title, na nagtapos sa 2nd round knockout.

“Sabi ni boss JC (Manangquil) na tuloy lang ang chance pwede kami maglaban, kaya ngayon masaya ako at ng coaches ko na nabigyan ako ng pagkakataon na maglaban kami,” pahayag ni Canoy sa panayam nito sa Bulgar Sports kahapon na sasampa sa laban tangan ang nine-fight winning streak kabilang ang 6 round unanimous decision panalo kontra Remark Antaran nitong Oktubre 11 sa General Santos City.

Para kay Canoy, hindi nito palalampasin ang laban na tapusin ang malinis na kartada ni Collazo (15-0, 12 KOs). “Nakakadismaya noong hindi matuloy ‘yung laban namin, kase one-week na lang paalis na sana kami kaso nagka-problema. Pero tuloy pa din ang gameplan namin nila coach (JR Edurot) kung paano siya puwede sabayan at papasukin,” esplika ng dating World Boxing Council International minimumweight titlist.