Paalam itataya ang silver para sa gold medal match

by Gerard Arce @Sports News | September 30, 2026

Photo: Ang laban ni Carlo Paalam sa Kazakh at nakatiyak siya ng silver medal. (pocmedia)

Dumidikit na ang Pilipinas para tuldukan ang 16-taong pagkagutom sa gintong medalya sa Asian Games matapos mailusot ni 2020+1 Tokyo Olympics silver medalist Carlo Paalam ang 3-2 split decision panalo kontra kay dating World champion Makhmud Sabyrkhan ng Kazakhstan ngayong Miyerkules sa men’s under-55kgs division sa 20th Aichi-Nagoya 2026 boxing sa Nishio Gymnasium sa Japan.

Huling beses nakatikim ng korona sa boksing ang bansa mula kay Rey Saludar sa 52kgs category sa 2010 Guangzhou Asiad – makalipas ang tatlong edisyon – susubukan ni Paalam na masundan ang kampeonato at maibigay ang unang ginto sa Asiad meet matapos ang tansong medalya sa 2018 Jakarta-Palembang sa flyweight.

Nasilip ng tatlong hurado na sina Jovana Ugrenovic ng Serbia, Blazo Jabucanin ng Montenegro at Manuel Vilarino ang pagpabor kay Paalam, habang mula umpisa ay nakita ni Athmen Lazizi ng Algeria ang pagpabor sa Kazakhstani, gayundin si Soulimi Moushine ng Morocco.

Tanging si Paalam ang nalalabing boksingero matapos malaglag sina two-time Olympic medalist Nesthy Petecio, 2024 Paris Olympics bronze medalist Aira Villegas, Riza Pasuit, Norlan Petecio, at Junmilardo Ogayre, habang nabigong makasunod si two-time Olympian Eumir Felix Marcial dahil sa katatapos na pro-fight nitong Setyembre sa Estados Unidos.

"Lalabas 'to siya, gawin ko yung laro ko... unahan lang kami paano mag counter," eksplika ni Paalam patungkol sa diskrate ni Sabyrkhan, na ipinakita sa mga hurado at referee ang kanyang matibay na dugong Pinoy, higit na sa huling round, matapos makalamang ang Kazakhstani sa second round.

"Pinapakita ko sa referee na Pinoy tayo, dugo natin 'to, kahit magkamatayan tayo... ibibigay talaga sa last round."

Matinding pukpukan at palitan ng mga birada ang nasilayan sa dalawang kampo higit na sa first round na kinakitaan muli ng pambihirang counter punching ng two-time Southeast Asian Games champion na sinabayan naman ng mga pasundot-sundot na suntok upang maagang maka-ungos sa first round mula sa apat na hurado.

Mas naging agresibo ang 2023 at 2025 World Championship gold medalist at 2024 Asian Championship champ na Kazakhstani sa second round na patuloy sa paghabol sa Pinoy boxer.

Subalit nanatiling matulis ang mga binibitawang counter punching at mga pasulpot-sulpot na jabs, habang nakatama naman ng isang solidong kanan sa second round si Paalam, na ikinabagsak ni Sabyrkhan.

Gayunman, pumabor ang tatlong hurado kay Sabyrkhan sa naturang round, na sinabayan naman ng isang puntos na kaltas kay Paalam.

Nanatiling maingat sa kanyang mga galaw at diskarte ang 28-anyos mula Talakag, Bukidnon sa third round na patuloy na sinusugod ni Sabyrkhan, na sa bandang huli ay nailusot ang ikatlong sunod na panalo mula kina split decision panalo kay Commonwealth Games silver medalist Jaudamani Mandengbam ng India sa round of 16 at isa pang 3-2 split decision kontra Jiamao Zhang ng China.

Tapales at Laurente nasuntok WBF KO's crowns sa Thailand

by Gerard Arce @Sports News | September 27, 2026

Photo: Tapales at Laurente. asianmma/juanderradyo

Tagumpay sa kanyang debut sa bagong weight division si dating unified world champion Marlon “Nightmare” Tapales matapos ikasa ang second-round knockout kontra hometown bet Nirun Baonok para sa World Boxing Federation (WBF) International featherweight title, habang nanatiling unbeaten si Criztian “Golden Boy” Laurente matapos patumbahin sa third round ang isa pang Thai boxer na si Benchalong Tanbu sa co-main event para maging WBF International lightweight titlist, sa UH-F-CC Pattaya, Thailand.

Hangad ng 34-anyos mula Tubod, Lanao del Norte na makamit ang kanyang ikatlong korona sa panibagong dibisyon, na nagawang pabagsakin ng dalawang beses ang Thai boxer tungo sa ika-42nd panalo laban sa limang talo, kasama ang tagumpay sa 23 knockouts sa main event, habang bumagsak sa 15-34 ang Thai boxer.

Maagang nagpamalas ng matinding birada ang dating two-division titlist sa opening bell pa lamang ng bumato ng eksaktong mga bira at kumbinasyon upang pataubin si Baonok. Bagaman nakaligtas sa first round, ipinagpatuloy ni tapales ang kanyang mga detalyadong counterpunching upang tapusin ang Thai boxer.

Nakabawi si Tapales sa masaklap na unanimous decision na pagkatalo kay Yukinori Oguni ng Thailand noong Abril para tapusin ang four-fight winning run ng Pinoy boxer.

Sa kabilang banda, nagpasikat rin ang kakampi ni Tapales na si Laurente nang tapusin ang isa pang Thai boxer para iangat sa 17-0 ang rekord kasama ang 10 knockouts, para mailista ang back-to-back panalo ngayong taon matapos ang fourth round TKO kontra Jing Aguan nitong Hunyo sa General Santos City, habang bumagsak naman sa 6-3-1 ang kartada ni Tanbu kasama ang tatlong KOs.

Asian Games: Olympians Paalam at Petecio, umusad pareho sa quarterfinals

by Gerard Arce @Sports News | September 26, 2026

Photo: Ang maaksiyong pakikipagbakbakan nina Paalam (men's) at Petecio (women's) upang makapasok sa quarterfinals ng Asian Games boxing. (pocmedia)

Kapwa tagumpay ang dalawang nalalabing Olympian medalists na sina Carlo Paalam at Nesthy Petecio na sumuntok ng magkahiwalay na tagumpay ngayong Sabado upang umusad sa quarterfinals ng 20th Asian Games Aichi-Nagoya 2026 boxing event na ginanap sa Nishio Gymnasium sa Aichi, Japan.

Walang planong huminto para sa inaasam na gintong medalya ang kapwa silver medalists sa 2020+1 Tokyo Olympics matapos parehong lampasan at dispatyahin ang kanilang mga katunggali sa round of 16 boxing events, kasunod ng pagkakatalsik ni 2024 Paris Olympics bronze medalist Aira Villegas sa women’s 51kgs, beteranong si Riza Pasuit sa women’s 54kgs division, at Norlan Petecio sa men’s 70kgs.

Naunang natakasam ng 2018 Jakarta Asiad bronze medalist na si Paalam si Commonwealth Games silver medalist Jadumani Mandengbam ng India sa bisa ng 3-0 split decision sa men’s 55kgs division, matapos masilip nina Ben Mcgarrigle ng Ireland at Osama Hanafy ng Egypt na tabla ang laro, habang pumabor naman ang tatlong nalalabing hurado na sina Maruf Urdushev ng Uzbekistan, Mohammad Mustafa Alkasbeh ng Jordan at Sarra Bouhlel ng Tunisia kay Paalam.

• 

"Mahusay din ang Indian, kapag bago gusto nila matalo ang may pangalan na. Nakisabay na lang ako sa kanya sa huling round," pahayag ni Paalam sa POC Media, na bagaman matagal na nabakante sa bakbakan ay mas malugod na tinatanggap ang kanyang kasalukuyang pangangatawan.

"Sobrang ganda po yung laban namin. Tsaka nag-adjust din po talaga ako sa taas ng ring kanina po kasi yun nga, first time ko lumaban ngayon,” dagdag ng 28-anyos mula talakag, Bukidnon na tila naihantulad ang ginagawa ng nag-iisang eight division world champion Manny “Pacman” Pacquiao sa ibabaw ng ring.

Hindi naman kinailangan tapusin ng 2019 World champion at two-time Olympic medalist na si Petecio ang laban kontra Mays Alreem Abukhadijah ng Jordan nang mapagdesisyunan ni referee Rukman Wekadapola ng Sri Lanka na tapusin ang laban kasunod ng dalawang standing eight count mula sa mabigat na hooks ni Petecio.

Parehong masisilayan sa Lunes, Setyembre 28, sina Paalam at Petecio sa quarterfinals, habang pasok na rin si Junmilardo Ogayre sa men’s 60kgs category final eight, para sa six-man team ng national pugs na susubukang tuldukan ang 16-taong pagkagutom sa ginto sa Asiad quadrennial meet na huling kinuha ni Rey Saludar sa 2010 Guangzhou Games.