Lolang street sweeper, kinaladkad ng delivery van

ni Maeng Santos @News | August 29, 2026

Photo: Streetsweeper nakaladkad ng delivery van - Koy'zky Spotted PH via page of Wes Gatchalian

Malubhang nasugatan ang 63-anyos na lolang street sweeper matapos makaladkad ng delivery van sa Valenzuela City.

Kinailangang operahan sa balikat at mga paa ang biktimang si alyas Cora, sa Philippine Orthopedic Center matapos siyang ipalipat ni Mayor Wes Gatchalian mula sa Valenzuela Medical Center kung saan una siyang isinugod noong Martes ng umaga, Agosto 25.

Sa ulat ng tanggapan ni NPD Director P/BGen. Benliner Capili, dumaraan ang delivery van ng J&T Express na minamaneho ng 51-anyos na tsuper sa Brgy. Gen. T. De Leon alas-6:49 ng umaga nang sumabit sa hulihang bumper nito ang nakalaylay na kable na aksidente namang pumulupot sa katawan ng biktima na dahilan upang makaladkad siya at tumama pa ang katawan sa poste ng kuryente.

Noong Huwebes, personal na dinalaw ni Mayor Wes sa pagamutan ang biktima bago nagpatawag ng pagpupulong sa mga kinatawan ng courier service at Meralco upang alamin ang kabuuang detalye sa nangyaring insidente.

Nangako naman ang J&T na sasagutin ang gastusin sa operasyon ng biktima at agad nagpadala ng paunang tulong na P200,000 habang tiniyak din ng Meralco na magbibigay sila ng tulong kahit na naglabas sila ng patunay na hindi sa kanila ang kableng nakalaylay na ikinabit sa kanilang poste.

Sa kabila nito, mahaharap pa rin sa kasong Reckless Imprudence Resulting in Serious Physical Injuries ang driver ng delivery van, habang inutos na rin ng alkalde sa CSWDO na magkaloob ng kinakailangang pinansiyal na tulong sa pamilya ng biktima.